AKR-ja premton 200 milionë euro investime në Drenas

Drenasi do të përfitojë 200 milionë euro investime, për 4 vitet e ardhshme nga ana e AKR-së.

Kështu ka premtuar presidenti i AKR-së, Behgjet Pacolli dhe kandidati i kësaj partie për kryetar të Komunës së Drenasit, Elmi Thaçi, gjatë vizitës që me bashkëpunëtorë iu kanë bërë fshatrave Krakjovë, Gllobar, Çikatove e vjetër, Llapushnik e Negroc.

Kandidati i AKR-së për kryetar të Komunës, Elmi Thaçi iu ka thënë banorëve të këtyre fshatrave se do ta zhdukin nga faqja e dheut korrupsionin, kompanive të huaja që dëshirojnë të investojnë në Drenas do tua krijojnë kushte për investime, nuk do t’iu kërkojnë haraç, siç kanë bërë këta të PDK-së për këto 17 vite të qeverisjes kriminale të tyre.

“Do të kthejmë rregullin në punë në të gjitha institucionet, do të bëhemi shërbëtor të popullit e jo sundues të tyre”, ka thënë Thaçi, thuhet në njoftim.

“Drenasi ka resurse të mëdha si ato njerëzore po ashtu edhe  pasuri me toka pjellore e burime të shumta ujore që i ka fal Zoti këtij vendi. Pos kësaj Drenasi është në qendër të Kosovës dhe çdo investitor i huaj por edhe vendor ka dëshirë që të investojë këtu për arsye të shumta, por edhe ato të infrastrukturës, pasi që transporti nga këtu është shumë i lehtë”, ka thënë presidenti i AKR-së, Behgjet Pacolli.

“PDK-ja po ju mashtron po premton 80 milionë euro, po këto janë para të buxhetit të Kosovës, ndërsa që AKR-ja premton 200 milionë euro para këto që do të vijnë nga investitorët e huaj e jo para të buxhetit”, ka nënvizuar Pacolli.

“Qeveria e Kosovës duhet urgjentisht që të ndërmarr hapa radikal në ekonomi që t’iu krijoj kushte këtyre të rinjve që të punësohen, në të kundërtën kam frikë se po shpërtheu pakënaqësia tek kjo rini do të jetë shumë keq për Kosovën”, ka thënë Pacolli.

“AKR-ja këtu në Drenas, kandidat për kryetar të Komunës ka përzgjedhur Elmi Thaçin, një njeri të ndershëm e afaristë të mirë, por një gjë do t’iu them se asnjëherë Elmia në asnjë rast nuk do të qeverisë me Komunën si kanë qeverisur këta të PDK-së për 17 vite”, ka thënë Pacolli.