AKB: BE-ja, i heq sanksionet Kosovës pas 25 viteve

Aleanca Kosovare e Bizneseve (AKB), përshëndet vendimin e vonuar të Komisionit Evropian për heqjen e vizave për qytetarët e Kosovës në zonën Shengen.

Lëvizja e lirë e qytetarëve dhe bizneseve të Kosovës ishte sanksionuar nga vendet e BE-së qysh para 25 viteve, jo për fajin e Kosovës, por për shkak të shpërbërjes së Jugosllavisë dhe luftërave në Ballkan.

Kosova mbeti e fundit e izoluar jo vetëm nga vendet e BE-së, por edhe nga disa vende të Ballkanit, ku së fundi tashmë kemi një sinjal të qartë për lëvizjen e lirë të qytetarëve.

“Kosova e varfër për izolimin e bërë nga BE-ja pagoi mbi 300 milionë euro për marrje të vizave që nga pas lufta e këndej dhe ky ishte ndëshkimi i më madh financiar për të gjithë, sepse vendet e tjera që iniciuan luftërat dhe prishen marrëdhëniet me BE-në, ata u shpërblyen më herët nga BE-ja për lëvizjen e qytetarëve të tyre”, thekson komunikata e AKB-së.

Sot Kosova e fundit i bashkohet vendeve të tjera për lëvizjen e lirë të bizneseve dhe qytetarëve dhe që në të kaluarën shumë biznese humben kontakte, por edhe mundësi për të zhvilluar bizneset me homologët nga vendet evropiane për shkak të politikës selektive që u aplikua ndaj kosovarëve.

“Por kjo nuk është fundi, është një fillim i ri për ne, vendi duhet që të ndjek hapat dhe kriteret e shteteve të integruara në BE, sesi duhet ti shfrytëzojmë këto lehtësira të vonuara, ku parashihet që të kemi lëvizje të lirë për biznes, turizëm dhe shteti familjare, por jo edhe qëndrim e punësim në vendet e BE-së”.

Këto janë kritere që duhet ti respektojnë të gjithë, sepse Kosova edhe pse e fundit e fitoi këtë të drejtë mund të sanksionohet nëse fluksi i qytetarëve mund të rritet drejt BE-së për të kërkuar azil apo forma të tjera strehimi, e që nuk janë pjesë e marrëveshjes së lëvizjes së lirë në zonën Shengen.

Qeveria e Kosovës, duhet të vazhdoi reformat ekonomike, politike dhe demokratike në mënyrë që të vazhdoi bashkëpunimi me BE-në sipas standardeve të saj. Në anën institucionet duhet t’iu krijojnë parakushte bizneseve e qytetarëve për të punuar e jetuar në Kosovë, duke parandaluar dëshirën për braktisur vendin për kushte më të mira për jetës. /Telegrafi/