Ahmeti: Për Prishtinën e pastër në çdo lagje e çdo fshat

Me modelin e ri për menaxhimin e mbeturinave, Prishtina do të jetë e pastër që në vitin e parë. Është çështje e shëndetit publik, andaj e kemi prioritet kryesor.

Kështu ka thënë kryetari i Prishtinës, njëherësh kandidat i Lëvizjes Vetëvendosje, edhe për një mandat.

“Gjatë mandatit të parë kemi pastruar më shumë se 200 deponi ilegale, bashkë me Inspekcionin dhe kompanitë për mirëmbajtje. Prej vitit 2018, nuk do të ketë më nevojë për një gjë të tillë”.

“Bashkë me GIZ-in gjerman, tash e dy vite kemi punuar në ndërtimin e një modeli të ri të operimit, për menaxhimin e mbeturinave në kryeqytet. Tashmë e kemi planin të gatshëm, se si ta bëjmë Prishtinën të pastër në secilën lagje. Nga janari 2018, nis zbatimi i rregullores së re, përmes së cilës pagesa për pastrimin bëhet në Komunë, e jo në kompani. Do të shtohet numri i kontejnerëve, dhe do të përfshihen të gjitha lagjet dhe fshatrat e Prishtinës. Do të ketë plan të ri aksional gjithpërfshirës, me orare të sakta në secilën pikë”, ka thënë Ahmeti.

Sipas tij, me shumicën në Kuvendin Komunal, do të bëhen reformat e nevojshme në kompaninë “Pastrimi”, ashtu që të eliminohen problemet politike.

Po sipas Ahmetit, “Pastrimi”, do të jetë operatori kryesor brenda sistemit të ri të menaxhimit të mbeturinave, duke shtuar se kompanitë e tjera angazhohen vetëm në rast se “Pastrimi” nuk arrin ta mbulojë gjithë terrenin.

“Më këtë reformë, asnjë punëtor i pastrimit nuk rrezikohet, por përkundrazi iu përmirësohen kushtet e punës”.

I pari i komunës ka thënë më tej se në fillim të vitit 2018, do të fillojnë ndërtimin e deponisë për mbeturinat interte. Kjo, sipas tij, mundëson që të gjithë ndërtimtarët dhe qytetarët tjerë t’i hedhin direkt mbeturinat inerte në lokacionin e caktuar.

“Me këtë plan tonin, do të bëhet edhe reciklimi i mbeturinave, me ç’rast kujdesemi që ta ruajmë ambientit në Komunën tonë”, ka thënë Ahmeti. /Telegrafi/