Agolli: Austria na tregon ku jemi

Sipas mbrojtësit të Kombëtares shqiptare, Ansi Agolli, ndeshjet me Austrinë dhe Luksemburgun janë të rëndësishme.

Ansi Agolli, mbrojtësi i Kombëtares dhe Karabakut është optimist para Evropianit duke theksuar se kuqezinjtë shkojnë në Evropian me moralin e lartë e për të vijuar atë që nisën pas ndeshjes me Armeninë.

“Jemi optimist dhe morali është shumë i lartë pas kualifikimit. Te skuadra jonë nuk ka vend për eufori, pasi ne nuk jemi një ekip i madh si Franca. Duhet të jemi me këmbë në tokë dhe të vazhdojmë rrugën drejt Evropianit. Këtu nis puna e lënë në Armeni”.

Më tej, në prononcimin e tij për “Panorama Sport”, Agolli vlerëson dy testet miqësore me Austrinë e Luksemburgun.

“Austria është një nga ekipet pjesëmarrëse në “Francë 2016”, kundërshtar cilësor e me nivel të lartë. Besoj se do të jetë një nga testet më të mira para se të shkojmë në Francë, duke ditur që skuadrat me të cilat do të përballemi do të jenë të së njëjtës shkallë vështirësie me të. Por, gjithashtu edhe Luksemburgu e ka ngritur mjaft nivelin e futbollit dhe kam besim se do të jenë dy teste shumë të vlefshme për ne”.