Agim Maliqi: Këshilli Gjyqësor duhet të hulumtojë pse rastet e krimeve seksuale janë parashkruar

Gjyqtari i Gjykatës Supreme, Agim Maliqi, ka thënë se është optimist që viteve të fundit ka përmirësim në trajtim të lëndëve të krimeve seksuale.

Ai në emisionin “Kallxo Përnime” potencoi se raporti që u publikua para disa ditëve për mbi 190 lëndë të parashkruara të kësaj natyre, nuk janë raste të viteve të fundit.

“Statistika e nxjerrë është e viteve 2016-2019 dhe unë jam optimist se këto tre vitet e fundit ka ndryshuar diçka. Shpresoj që statistikat e ardhshme do jenë shumë më shpresëdhënëse. Krimet seksuale duhet të denoncohen, pastaj policia e prokuroria duhet t’i koordinojnë procedurën hetimore që të ketë bazë për gjykim”, ka thënë ai.
Për lëndët që janë parashkruar Maliqi shtoi se Këshilli Gjyqësor duhet të hetojë se përse ka ardhur situata deri  këtu.

“Duhet të informojmë publikun se instituti i parashkrimit është një kohë e kaluar, ku shteti e ka të drejtën që ta ndjekë kryesin e veprës penale për një kohë të caktuar dhe ajo varësisht prej veprës penale. Nëse 180 raste janë vjetërsuar, kjo është një situatë mjaft shqetësuese që mundet me qenë material i mirë për Këshillin Gjyqësor që më pas t’i hulumtojnë rast për raste e të vihet në një konkludim se si është e mundur që krimet seksuale në vendin tonë të parashkruhen. Me këtë duhet të merret Këshilli Gjyqësor dhe aspekti disiplinor nëse gjenden shkelje  në këto raste”, ka thënë Maliqi.

“Parashkrimi fillon të rrjedhë prej ditës kur kryhet vepra penale, kjo në fakt duhet të shihet se si kanë vepruar edhe akterët tjerë policia, prokuroria, me qëllim që të verifikohet çdo stad i procedurës penale”, shtoi tutje Maliqi.

Brenda një periudhe 5-vjeçare në Kosovë janë ngritur mbi 500 aktakuza nga prokuroria për vepra penale të dhunimeve dhe abuzimeve seksuale.

Mesatarja e mbi 100 aktakuzave në vit duket se është si rezultat i “përkëdheljes” me dënime të buta ndaj kryerësve të krimeve seksuale nga gjykatat e vendit. Kjo praktikë tregon se numri i atyre që shkojnë në burg për veprime të tilla është më i ulët se sa i atyre që shpëtojnë “pa ferrë në këmbë”.

Në të dhënat e analizuara, BIRN ka trajtuar të gjitha lëndët e veprave penale të krimeve kundër integritetit seksual ku hyjnë dhunimi, trafikimi seksual, sulmi seksual, degradimi i integritetit seksual, keqpërdorimi i fëmijëve në ponografi, prostitucioni dhe marrëdhëniet seksuale brenda familjes.

Për këto vepra, Ligji ka paraparë dënime të ashpra, mirëpo të tilla nuk po shqiptohen nga gjykatat e vendit pasi në shumicën e rasteve dënimet janë minimale.

Databaza e Millenium Foundation Kosovo, nga ku janë nxjerrë të dhënat për këtë publikim shfaq të dhëna të cilat dëshmojnë se qindra dosje janë vjetërsuar si rezultat i mostrajtimit me kohë nga gjyqësori.

Sipas këtyre të dhënave, nga viti 2016 e deri në vitin 2019 janë parashkruar plot 197 raste të krimeve seksuale.