Adomaitis vlerëson lartë fansat e Kosovës, Greenberg arsyeton humbjen ndaj Lituanisë

Përfaqësuesja e Kosovës në basketboll të premten mbrëma ka pësuar humbje në kuadër të kualifikimeve për botërorin “Kina 2019”.

Kosova para shikuesve të vetë në Pallatin e Rinisë dhe Sporteve në Prishtinë është mposhtur prej Lituanisë me rezultat 99-61.

Pas takimit kanë folur të dy trajnerët e përfaqësueses, Brad Greenberg i Kosovës dhe lituanezi, Darius Adomaitis.

Ky i fundit deklaroi se kishte pritur një atmosferë të zjarrtë që krijojnë fansat, ndërsa pjesa e dytë ishte vendimtare në fitoren e tyre.

“Ne kemi dëgjuar shumë për fansat në Kosovë dhe kjo u vërtetua edhe sonte, se ata dinë të bëjnë atmosferë vërtetë të mirë. Megjithatë ne luajtëm më mirë, sidomos në pjesën e dytë, kur arritëm të praktikojmë mbrojtje shumë të fortë, duke e ditur edhe që Kosova nuk ka rotacion të mirë, andaj e gjithë kjo bëri që ne në fund të shënojmë fitore shumë të rëndësishme këtu në Kosovë”, tha Adomaitis.

Në anën tjetër, amerikani Brad Greenberg ka pohuar se ishte një ndeshje e vështirë dhe ne rezistuam në njëzet minutat e para.

“Ishte një ndeshje e vështirë, ashtu edhe siç e kemi parashikuar. Lituania është një kundërshtar shumë i fortë, këtë e kemi thënë edhe para kësaj përballjeje. Ne i patëm 20 minutat tona të mirë, por më pas Lituania na krijoi probleme dhe kjo bëri që në fund ata të fitojnë më koshdallim të madh. Sidoqoftë fakti që po luajmë në kualifikime do të thotë shumë, sidomos për Kosovën, andaj ne na mbetet të përmirësohemi në ato elemente që sonte nuk ishim në nivelin e duhur. Kemi ende ndeshje të tjera në këto kualifikime, andaj ne do të përgatitemi së pari për takimin e radhës kundër Hungarisë, dhe më pas do të shohim të shkojmë hap pas hapi”, tha Greenberg.

Basketbollisti më efikas te Kosova ishte Dardan Berisha me 19 pikë ndërsa te lituanezët më i miri në fushë ishte Adas Jasikevicius me 16 pikë.

Lexo po ashtu Kosova nuk ia del dot përballë tri herë kampionit të Evropës (Foto)

Pas kësaj, Lituania zë pozitën e parë të renditjes tabelore të Grupit C me dy pikë, po aq sa ka edhe Polonia, e cila triumfoi kundër Hungarisë me rezultat 70:60.

Kujtojmë se në takimin e radhës Kosova do të jetë mysafire e kombëtares së Hungarisë ndërsa Lituania do ta pres para shikuesve të vetë Poloninë. /Telegrafi/