Spitalet e “Acibadem” në Stamboll ndër spitalet me kushtet më bashkëkohore në botë. Këto spitale kanë departamente të ndryshme, mjekët e të cilëve me përqindje të lartë përfundojnë operacione të suksesshme çdo vit.
Disa mediume nga Maqedonia, pjesë e tyre edhe Telegrafi, kanë pasur rastin që javën e kaluar të shohin praktikisht kushtet që ofron “Acibadem Healthcare Group” në Stamboll.
Një nga departamentet më të zhvilluar ishte edhe ai i neurokirurgjisë pediatrike, tek e cila kryheshin prej 600 deri 700 ndërhyrje në vjet.
Neurokirurgu për fëmijë Mehmet Ozek, tha se 50 përqind e pacientëve janë nga shtetet e huaja, ndërsa numri më i madh i tyre kanë tumor në pjesën qendrore të trurit, paralizë cerebrale dhe sëmundje tjera.
“Me këto pacientë punon ekipi tek i cili përfshihen ortoped, neurolog, neurokirurg, mjek për analiza në lëvizje dhe fizioterapeut, të cilët duhet të punojnë së bashku. Për disa diagnoza siç është paraliza cerebrale, terapia është shumë e rëndësishme”, tha Mehmet Ozek.
Profesori Mehmet Ozek, foli edhe për bashkëpunimin me mjekët nga Maqedonia, për të cilët tha se nuk kanë shprehur interesim që të bashkëpunojnë personalisht me të. Ai shtoi se dyert e spitalit për bashkëpunim çdo herë do të jenë të hapura.
Në departamentin e neurokirurgjisë pediatrike, pjesë e ekipit ishte edhe mjeku me prejardhje nga Gostivari, Enis Shaban. Gjatë bashkëbisedimit me gazetarët ai tha se për shkak të zhvillimit të madh të teknologjisë vitet e fundit, është e patjetërsueshme që të ndiqet dhe të punohet me to.
Edhe ai u pyet për bashkëpunimin me mjekët nga Maqedonia, për të cilët tha se nuk ka pasur interesim për bashkëpunim.
“Njoh shumë kolegë nga Maqedonia të cilët nëse kishin ardhur këtu do të kishin përvojë të madhe, por nuk e di se si është puna. Më duket se akoma nuk kanë kaluar nga ajo e vjetra, në atë të renë. Nuk është puna vetëm që të vijnë, por duhet edhe ta shfrytëzojnë teknologjinë”, tha mjeku Enis Shaban.
Ai tha se në spitalin “Acibadem” kanë program për subspecializim i cili zgjat gjashtë muaj, ndërsa mjekët që dëshirojnë subspecializim mund edhe të ndjekin operacione në Qendrën për analiza në lëvizje.
Një nga teknologjitë më bashkëkohore në spitalet e “Acibadem” ishte edhe ajo e “CyberKnife”, e cila ishte për operacione për tumor, por pa prerje operacionale. Ky sistem është për të shkatërruar tumorin, ndërsa përdorej edhe për trajtimin e metastazave të trurit dhe malinje tjera.
Përveç kësaj, në këto spitale pjesë të teknologjisë së zhvilluar ishin edhe robotët, të cilët bartnin ushqime, veshje dhe gjëra tjera për pacientët.
Përveç vizitave në spitale, gazetarët patën mundësinë që të vizitojnë edhe Universitetin “Acibadem” dhe kompaninë për konstruksione inxhinierie “Acibadem Proje Yonetimi”./Telegrafi/
