Mbi 4 mijë çifte e kanë regjistruar pronën në emër të dy bashkëshortëve gjatë vitit 2022

Edi Gusia nga Agjencia për Barazi Gjinore ka thënë se numri i grave që trashëgojnë pronën është shumë i vogël.

Ai tha se vendi çalon si në trashëgiminë e pronës nga gratë po ashtu edhe në  regjistrimin e pronës në emër të dy bashkëshortëve.

“Shifra e trashëgimisë, numri është edhe më i vogël sesa te prona e regjistruar në emër të dy bashkëshortëve. Agjencia për Barazi Gjinore më 2016 i pat propozuar Qeverisë një masë afirmative për regjistrimin e pronës së përbashkët në emër të dy bashkëshortëve pa pagesë. Në vitin 2016 kemi pasur vetëm 105 çifte që e kanë regjistruar pronën e përbashkët në tërë Kosovën e më 2022 janë 4 mijë 375 çifte që e kanë bërë këtë”, ka thënë Gusia.

Suzana Gashi nga Zyra e Avokatit të Popullit ka thënë se udhëzimi administrativ si masë afirmative për regjistrimin e pronës së përbashkët është shumë inkurajues, por nuk mjafton.

“Ne kemi një sistem të trashëguar që pa marrë parasysh nëse gruaja për pronën e fituar gjatë periudhës sa ka qenë e martuar, qoftë e regjistruar apo jo, ajo është pronare e gjysmës së pronës dhe kjo nuk është dashur as të diskutohet. Korniza ligjore në përgjithësi është mirë por tash problemi është te zbatimi në praktikë. Nuk do të thotë që vetëm me divorc ke me kërkuar pjesën tënde, në çdo kohë ke të drejtë me e veçu pjesën tënde”, ka thënë Gashi.

Gashi ka shtuar se dekurajues është fakti që institucioni i Avokatit të Popullit merr shumë pak ankesa sa i përket çështjeve pronësore. /Kallxo/