​Presidenti Thaçi e pret Vitin e Ri në mesin e ushtarëve të Kosovës: Kur të tjerët po festojnë ju po mbroni kufijtë e vendit

Presidenti i Kosovës, Hashim Thaçi gjatë ndërrimit të moteve ka qëndruar në Kazermën “Adem Jashari” të Forcës së Sigurisë së Kosovës.

Komandanti suprem tha se Ushtria e Kosovës është nderi i vendit dhe shtoi se ka besim të plot tek ta.

“Janë në krye të përgjegjësive të tyre, të ruajtjes së territorit të Kosovës, te kufijve të Kosovës, të ushtrisë që janë nderi dhe krenaria e shtetit dhe qytetarëve, këtu në Kazermën ’Adem Jashari’, në Prishtinë. Në këto momente ku të gjithë qytetarë e Kosovës janë duke festuar ndërrimin e motomoteve me mesazhet e lumturisë, respektit e dashurisë, begatisë. Ushtria e Kosovës është në krye të përgjegjësive të tyre, në krye të obligimeve kushtetuese, dhe ligjore. Prandaj nderim e respekt për çdo ushtar, ushtare të Kosovës. Ju jeni nderi ynë dhe shteti i Kosovës do të jetë gjithmonë afër jush, me ju dhe mbështetjen tuaj. Kam besim të plot në Forcën dhe energjinë dhe angazhimin tuaj të jashtëzakonshëm”, tha Presidenti Thaçi.

Komandanti i FSK-së, Gjeneral-lejtnant Rrahman Rama garantoi Presidentit Thaçin se do t’i kryejnë punën me nder she përkushtim, raporton KosovaPress.

“Urime, viti 2020 do të jetë shumë më i mirë se ky. Ju sigurojmë që do t’i kryejmë të gjitha detyrat dhe obligimet që dalin”, tha ai. /Telegrafi/