Zjarr në një varkë në Haiti, të paktën 40 emigrantë të vdekur

Të paktën 40 emigrantë humbën jetën kur anija me të cilën po lundronin mori flakë pranë bregut të Haitit, njoftoi të premten agjencia e OKB-së dhe dëshmitarët shpjeguan se tragjedia ishte shkaktuar nga një ritual vudu.

Tragjedia ndodhi të mërkurën dhe sipas agjencisë së OKB-së, ajo ilustron edhe një herë shkallën e krizës që ka goditur vendin e varfër të Karaibeve, të minuar nga bandat dhe pasiguria dhe me qindra mijëra njerëz të zhvendosur.

Sipas të mbijetuarve, zjarri shpërtheu në anije kur një pasagjer ndezi një qiri për të kryer një ‘ceremoni’ vudu dhe kishte benzinë në bord, tha një zëdhënës i kompanisë së transportit për AFP.

Ritet vudu praktikohen ndonjëherë nga migrantët që shkojnë në det për të mbrojtur vendkalimet dhe për të shmangur rojet bregdetare.

Anija me “më shumë se 80 persona” u largua nga Labadie në veri të Haitit dhe u nis për në ishujt Turks dhe Kaikos, një arkipelag 250 kilometra larg, të mërkurën, sipas Organizatës Ndërkombëtare për Migracionin (IOM).

Roja Bregdetare e Haitit shpëtoi 41 migrantë, të cilët u kujdesën nga IOM, njëmbëdhjetë prej tyre u transferuan në spital për trajtim, përfshirë edhe djegiet, njoftoi agjencia e OKB-së.

Shtatë persona të plagosur janë në gjendje të rëndë, tha Arold Jean, zëdhënës i policisë haitiane në departamentin Nord, duke përshkruar “një zjarr të ndjekur nga një shpërthim”.

“Hetimi vazhdon me qëllim gjetjen e të mbijetuarve të tjerë”, ka theksuar ai, duke shtuar se hetimi është hapur për “identifikimin dhe thyerjen e rrjeteve që organizojnë këto udhëtime sekrete”.

“Situata socio-ekonomike në Haiti është në agoni. Dhuna ekstreme e muajve të fundit vetëm sa i ka inkurajuar haitianët që të përdorin edhe më shumë masa të dëshpëruara për t’u larguar nga vendi”, reagoi kreu i misionit të IOM-it në vend, Gregoire Goodstein. /Telegrafi/