Zgjidhje afatgjate energjetike për banorët e Batllavës

Banorët e katër lagjeve në rajonin e Batllavës, Bajraktarët, Ashkalinjtë, Zymerovit dhe Boshnjakët, tashmë kanë zgjidhur problemin e tyre energjetik, duke bërë një zgjidhje afatgjate për 50 vjetët e ardhshme.

Ata kanë përmirësim të dukshëm të shërbimeve dhe kanë hequr përgjithmonë prej përdorimit përforcuesit për pajisjet e tyre elektrike, sepse tani tensioni ka mbërritur nivelin stabil prej 220 volt.
Kjo është arritur pasi KEDS ka investuar fuqishëm duke vendosur edhe tri trafo të reja, që së bashku me tri trafot ekzistuese, mbulojnë plotësisht nevojat e banorëve të kësaj ane.

Për realizimin e punimeve në këtë projekt është bërë implementimi edhe i 246 shtyllave të tensionit të ulët dhe 92 shtylla të tensionit të mesëm, dhe gjithsej 12011m rrjet të tensionit të ulët dhe 3 transformatorë të rinj, njëri me fuqi 250kVA, ndërsa 2 të tjerë me fuqi 160kVA, si dhe janë 3 transformatorë ekzistues.
Tepër të kënaqur me këto investime shprehen banorët e kësaj ane, të cilët thonë se në këto anë në rrjetin elektrik nuk është investuar që nga vitet e 70-ta.
“Na kanë shpëtu, na kanë zgjidhur problemin përgjithmonë, nuk dimë si me falënderu KEDS-in për këto investime”, shprehet pronari i kompanisë Batllava Turist, Shaban Aliu.

Numri i konsumatorëve të cilët kanë përfituar nga realizimi i këtij projekti janë gjithsej 254 familje.

KEDS po vazhdon projektin e investime nëpër të gjithë territorin e Kosovës në kuadër të Planit Zhvillimor, duke pasur prioritet lokacionet me rënie të tensionit.
Investimet e KEDS-it kanë nisur qysh në vitin 2013 dhe deri më tani kanë përfituar shërbime kualitative mijëra konsumatorë anekënd vendit. Deri në fund të vitit 2016 investimet e përgjithshme tejkalojnë shumën prej 80 milionë eurosh. /Telegrafi/