Zëvendëskryesuesi Bush në Karolinën e Veriut diskuton bashkëpunimin për edukim dhe qeverisje

Zëvendës kryesuesi i Kuvendit të Komunës së Prizrenit, Levent Bush po vijon vizitën në ShBA, me ç’rast ka zhvilluar takime me përfaqësues nga akademia dhe institucione të ndryshme.

“Si pjesë e IVLP (International Visitor Leadership Program), patëm mundësinë të takoheshim dhe të merrnim informacione nga përfaqësuesit e Universitetit të Karolinës Veriore, UNC Chapell Hill. Biseduam për edukimin universitar dhe të doktoraturës të të rinjve tanë dhe bashkëpunimin mes universiteteve mes dy vendeve. Në takimin produktiv ata u shprehën se janë të hapur për çdo lloj bashkëpunimi”, ka bërë të ditur Bush, raporton Telegrafi.

Sipas tij gjithashtu janë njoftuar edhe për sistemet e punës në nivel lokal dhe qendror nga anëtarët e Dhomës së Karolinës së Veriut dhe përfaqësuesit e Senatit.

“Në kuadër të programit u trajnuam edhe se si të realizojmë aktivitete vullnetare për mbrojtjen e natyrës dhe si të bashkëpunojmë me organizatat e shoqërisë civile në nivel lokal dhe qendror”, ka njoftuar Bush. /Telegrafi/