Zaev: Numër rekord i investimeve të huaja

Kryeministri Zoran Zaev duke u përgjigjur në pyetje deputetësh tha se “vitin e kaluar kemi arritur numër rekord në investime të huaja që nga pavarësia deri sot, këtë vit vetëm dy investime greke janë në vlerë prej 750 milion eurove”.

Ai tha se përveç 17 investime të huaja në vend për vetëm 20 muaj, në ditët e fundit të ratifikimit të marrëveshjes së Prespës në Kuvendin e Greqisë, gjashtë kompani nga Greqia kanë marrë vendim të investojnë këtu, përcjell Telegrafi Maqedoni.

“Krahas grekëve, kemi leje ta publikojmë emrin e një kompanie gjermane. Ajo është kompania ‘Gerresheimer’, me investim që kushton 120 milion euro dhe që për disa ditë në konferencë për shtyp do të njoftojë qëllimin”, tha Zaev duke shtuar se me kompaninë nga India kanë përfunduar formalitetet dhe se këto rezultate janë përfitime nga zgjidhja e marrëveshjes së Prespës dhe integrimet tona evropiane dhe anëtarësimi në NATO, që siguron stabilitet dhe siguri.

Kryeministri tha se investimet e huaja vitin e kaluar hapën 4500 vende të reja të punës të paguara mirë dhe shtoi se interesi i kompanive është rritur pa asnjë denarë të shpenzuar për reklamim dhe promovim./Telegrafi/