Manchester City po kalon një krizë të madhe nën urdhrat e Pep Guardiolës dhe tashmë mund të humbasin një prej lojtarëve më premtues të tyre gjatë janarit, me disa klube angleze që po përpiqen të sigurojnë shërbimet e tij. City ka fituar vetëm një ndeshje në 13 të tyre të fundit në të gjitha garat, duke bërë që kjo të jetë seria më e dobët e rezultateve që prej se Guardiola u bë pjesë e tyre në 2016. Në ndeshjen e tyre të fundit e cila u zhvillua në ‘Boxing Day’, City luajti baras me rezultat 1-1 ndaj Evertonit në ‘Etihad’. ‘Qytetarët’ tashmë renditen në pozitën e shtatë në Ligën Premier me 14 pikë mbrapa liderit Liverpoolit dhe duket se dominimi i tyre në Angli do të marrë fund këtë sezon.
Një lojtar i cili me gjasë do të largohet së shpejti nga klubi është James McAtee. Sipas një raportimi nga Daily Telegraph, 22-vjeçari po kërkon të ketë më shumë minuta dhe për këtë arsye po synon largimin nga City për shkak të mundësive të limituara.
McAtee ka bërë tetë paraqitje në të gjitha garat për Man Cityn këtë sezon duke shënuar një gol, teksa është aktivizuar në Ligën Premier në dy ndeshje nga banka.
