Ylli i “Joker 2” Tim Dillon: Është filmi më i keq i realizuar ndonjëherë

Tim Dillon, një nga aktorët që paraqitet në “Joker: Folie à Deuce”, ka dhënë një vlerësim tejet kritik për vazhdimin e filmit “Joker” të 2019-ës, duke e cilësuar atë si “filmin më të keq të realizuar ndonjëherë.”

Në një intervistë për podcastin “Joe Rogan Experience”, Dillon ka shpjeguar se ai dhe kolegët e tij e kishin pasur një ndjenjë të fortë se filmi do të “bombardonte” që në fazën e xhirimeve.

Vazhdimi i filmit, i cili ka në rolet kryesore Joaquin Phoenix si Arthur Fleck (Joker) dhe Lady Gaga si Lee Quinzel (Harley Quinn), u ballafaqua me kritika të ashpra nga kritikët përpara se të publikohej më 4 tetor, shkruan DailyMail.

Përveç kritikave negative, “Joker: Folie à Deuce” nuk e arriti suksesin e pritshëm në arkë.

Dillon, i cili luajti rolin e një roje në Arkham Asylum, ka shpërthyer kundër strukturës tërësisht të paqartë dhe të pasigurt të filmit.

Ai u shpreh: “Nuk ka asnjë komplot në këtë film. Dhe, po, ne të gjithë e dinim që do të dështonte që në momentin që filluam xhirimet”.

Për më tepër, Dillon tha se atmosfera në setin e filmit ishte kaotike, duke treguar se ai dhe pjesa tjetër e ekipit, të veshur me uniforma sigurie për rolet që luanin, u bënë dëshmitarë të një situate të pasigurt dhe të çuditshme gjatë xhirimeve.

“Ishim të gjithë të veshur me këto veshje sigurie, duke punuar në Arkham Asylum, dhe unë do t’i drejtohesha njërit prej kolegëve dhe do të dëgjonim këtë kaos, dhe thosha: “Çfarë është kjo, vallë?” Ata do të përgjigjeshin “Kjo do të bombardojë”, kujton ai.

Dillon theksoi se shumë aktorë të tjerë gjithashtu shprehën dyshimet për filmin, duke diskutuar gjatë pushimeve të drekës për mungesën e një komploti të qartë.

“Ne po flisnim në drekë dhe pyetëm, “Cili është komploti? A ka ndonjë komplot?” Ata përgjigjeshin, “Nuk e di, ndoshta ai bie në dashuri me të në burg?”, vazhdoi Dillon, duke e cilësuar përvojën si të tmerrshme. Ai përfundoi se filmi është kaq i dobët sa nuk mund të shikohet as nga urrejtja, duke theksuar se filmi është një “katastrofë totale”.

Kritikat e Dillon për “Joker: Folie à Deuce” janë një reflektim i madh i reagimeve të shumta të kritikëve dhe audiencës për këtë projekt të shumëpritur.

Pas suksesit të madh të Joker të 2019-ës, i cili fitoi dy çmime “Oscar” dhe u përshëndet nga audienca dhe kritika për mënyrën e trajtimit të karakterit të Arthur Fleck dhe analizën psikologjike të tij, vazhdimi ka dështuar të përshtatet me pritshmëritë e larta.

Në këtë situatë, ky koment i Dillon vjen si një tjetër dëshmi e paqartësisë që ka mbizotëruar rreth “Joker: Folie à Deuce”, një film që mund të ketë mbetur larg asaj që shumë shikues e kishin shpresuar, veçanërisht për shkak të angazhimit të madh të dy yjeve të njohur, Joaquin Phoenix dhe Lady Gaga. /Telegrafi/