Mes zhgënjimeve, ndjekjeve të pafundme dhe shpresave të vogla, sezoni i Wolverhamptonit deri tani ka qenë i mbushur me gjithçka. Fillimi i kampionatit ka qenë jashtëzakonisht negativ dhe fitorja e parë në Ligën Premier ka ardhur vetëm në muajin janar.
Megjithatë, në këtë gjysmë të parë shumë të vështirë të sezonit, ekziston edhe një notë pozitive: zbulimi i Mateus Mane, talentit 18-vjeçar që po përpiqet ta mbajë gjallë shpresën për shpëtim.
Gjatë gjithë rrethit të parë të kampionatit, Wolves kanë grumbulluar vetëm tre pikë, një nga bilancet më të dobëta në historinë e Ligës Premier. Së fundmi, megjithatë, diçka ka ndryshuar. Kanë ardhur tre rezultate pozitive radhazi: fillimisht barazimi në fushën e Manchester United, më pas fitorja e parë e sezonit në shtëpi ndaj West Ham dhe në fund një tjetër barazim në transfertë kundër Evertonit.
Emëruesi i përbashkët i këtyre paraqitjeve në rritje? Mateus Mané. Talenti 18-vjeçar po fiton zemrat e tifozëve me gola dhe asistime vendimtare.
Ai shënoi në dy ndeshje radhazi ndaj West Ham dhe Everton, ndërsa që në mesin e dhjetorit kishte tërhequr vëmendjen me një asist në “Emirates” kundër Arsenalit kryesues – edhe pse ai moment nuk mjaftoi për të shmangur humbjen.
Në Ligën Premier nuk mungojnë talentet e rinj, por ndryshe nga shumë të tjerë, Mane është i detyruar të ndikojë menjëherë dhe në mënyrë konstante te skuadra e tij.
Wolverhampton është ende i fundit në renditje me vetëm 7 pikë pas 21 javësh, ndërsa zona e mbijetesës është aktualisht 14 pikë larg.
Për t’u ringritur, klubi po mbështetet edhe te cilësia dhe lëvizjet e lojtarit me numër 36, i cili mund të luajë si sulmues qendror, si anësor i djathtë apo edhe si trekuartist.
Nga Premier League 2 te ekipi i parë, rritja e shpejtë e talentit të Wolves
I lindur në Portugali më 16 shtator 2007, Mané po merr vëmendjen e mediave falë një rritjeje shumë të shpejtë. Fillimi i sezonit të tij ishte i shkëlqyer në Premier League 2, kampionatin për skuadrat U21, ku në gjashtë ndeshje regjistroi 2 gola dhe 2 asistime.
Pikërisht këto paraqitje bindën drejtuesit e Wolverhamptonit ta afronin me ekipin e parë, në përpjekje për të ndryshuar rrjedhën e një sezoni katastrofik. Që nga fillimi i nëntorit kanë ardhur thirrjet e para dhe debutimet në Ligën Premier.
Në fund të nëntorit, në bankinën e klubit u ul Rob Edwards, i cili zëvendësoi të shkarkuarin Vítor Pereira. Trajneri uellsian besoi menjëherë te Mané dhe e lavdëroi pas golit të tij të parë.
“Kur hyri në lojë, koha ishte perfekte. Prekja e topit, pasimi, gjithçka ishte në nivel shumë të lartë. Vrapimi dhe përfundimi i aksionit ishin të jashtëzakonshme, prandaj dua të theksoj meritat e këtij djali,” u shpreh Edwards.
Nga zgjedhja e kombëtares te feja, kush është Mateus Mane?
Mané është formuar si një fantazist që vepron pas sulmuesit, por në këtë situatë të vështirë për Wolverhamptonin, ai po luan edhe si mesfushor i brendshëm me detyra mbrojtëse. Përveç golave, ai po garanton edhe një mesatare prej 1.6 topash të rikuperuar për ndeshje. Këto paraqitje i kanë mundësuar që të përfshihet për herë të parë edhe në “Skuadrën e Javës” në Ligën Premier.
Një talent i tillë, që po fiton gjithnjë e më shumë hapësirë, mund të tërheqë së shpejti vëmendjen e kombëtares. Por cilës? Mané ka luajtur me Portugalinë U17 dhe më pas ka regjistruar 7 paraqitje me Anglinë U18.
I lindur në Portugali, por i rritur në Angli – ku luan që nga mosha 9-vjeçare mes akademive të Rochdale dhe Wolverhampton – ai ka të drejtë të përfaqësojë të dyja shtetet.
Vendimi përfundimtar do të vijë më vonë, ndoshta kur të marrë ftesën nga një përfaqësuese A. Ata që e njohin thonë se Mané është një person shumë besimtar dhe shpesh ndan citate biblike apo mendime të lidhura me fenë e krishterë.
Tifozët e Wolverhamptonit shpresojnë ta shohin gjithnjë e më shpesh duke festuar me referenca ndaj besimit të tij – festa që mund ta nxjerrin edhe më shumë në pah në kampionatin më të fortë në botë dhe që mund të jenë çelësi i një mrekullie të vërtetë: shpëtimit të Wolves. /Telegrafi/
