WhatsApp është duke punuar në një funksion të ri për të kthyer mesazhet zanore në tekst

Në thelb, veçoria e re do t’i lejojë përdoruesit të konvertojnë përmbajtjen audio të mesazheve zanore në tekst të lexueshëm.

Karakteristika e re është ende në zhvillim dhe është menduar fillimisht për aplikacionin iOS WhatsApp. Platforma e mesazheve WhatsApp ka punuar dhe prezanton shumë veçori të reja kohët e fundit. Javën e kaluar u zbulua se WhatsApp ka përmirësuar aftësitë e saj të kriptimit, duke lejuar që mesazhet tuaja të koduara të ruhen në Google Drive ose iCloud.

Faqja Wabetainfo, e cila raporton rregullisht për lajmet që lidhen me WhatsApp, tha se transkriptimi do të bëhet në pajisje ose në nivel lokal, dhe mesazhet zanore nuk do të dërgohen në WhatsApp ose Facebook server për të marrë transkriptimin.

Ky funksion do të përdorë teknologjinë e Apple të “njohjes së të folurit”. Transkriptimi i tekstit do të bëhet në një seksion të veçantë të quajtur “Transkript”, dhe përdoruesit gjithashtu do të jenë në gjendje të kalojnë lehtësisht në një etiketë kohore specifike në transkriptim, thuhet në raport.

“Kur një mesazh transkriptohet për herë të parë, transkriptimi i tij ruhet lokalisht në bazën e të dhënave WhatsApp, kështu që nuk do të jetë e nevojshme ta transkriptoni përsëri nëse doni ta shihni atë transkriptim më vonë”, përfundon raporti.  /Telegrafi/