Vuçiq mendon se zgjedhja e estonezes Kaja Kallas “do ta bëjë Rusinë edhe më agresive” ndaj Perëndimit

Presidenti serb Aleksandar Vuçiq mendon se Komisioni Evropian i sapoemëruar do të ishte “më radikalisht anti-rus se ai i mëparshmi, i cili ishte dukshëm anti-rus”.

Në një prononcim për mediat në Serbi, Vuçiq kujtoi se kryeministrja estoneze Kaja Kallas, e cila do të pasojë Josep Borrell si Komisioner i Lartë për Politikën e Jashtme dhe të Sigurisë, i është ndaluar hyrja në Rusi, përcjell Telegrafi.

Ai ka fajësuar BE-në për krijimin e “Komisionit më radikal anti-rus të BE-së”.

“Ju po zgjidhni dikë që e dini se nuk do të shkelë kurrë në territorin rus. Evropianët do të thonë se është një mesazh i forcës dhe rezistencës ndaj agresionit rus. Ok, por cila do të jetë mesazhi nga rusët. Ata do të thonë se do të luftojnë deri në fund me çdo armë dhe mjet në dorën e tyre”, ka thënë ndër tjerash Vuçiq.

Lexo po ashtu Kush është Kaja Kallas, gruaja që mund të zëvendësojë Borrellin?

1. Recently Vucic has been spreading panic of an incoming WW3 spinning out of control from Ukraine. In his latest interview he blames EU for coming up with most “radical anti-Russian EU commission” and the appointment of @kajakallas as “person who cannot enter Russian territory”. pic.twitter.com/DiEuHftp3h

— Demush Shasha (@DemushShasha) July 3, 2024

Ndryshe Kaja Kallas njihet për qëndrimet e saj pro-Ukrainë dhe anti-Rusi edhe gjatë kohës sa ka shërbyer si kryeministre e Estonisë.

Kujtojmë se pushtimi rus i Ukrainës është në vitin e tretë dhe gjatë kësaj kohe Serbia nuk ka hequr dorë nga lidhjet e saj me Rusinë.

Zyrtarisht, Beogradi mbështet integritetin territorial të Ukrainës, por refuzon të vendosë sanksione kundër Moskës.

Ai e arsyeton refuzimin e tij me lidhjet miqësore me Rusinë, por edhe me mbështetjen që merr prej saj në nivel ndërkombëtar.

Në të njëjtën deklaratë, Vuçiq tha se zgjedhjet e ardhshme presidenciale në SHBA do të ishin “një garë e ngushtë dhe e vështirë që mund të përcaktojë fatin e botës”. /Telegrafi/