Klubi shqiptar, Voska Sport do të luajë nesër finalen e parë dhe historike në Kupën e Maqedonisë së Veriut, ndërsa për kundërshtarë do të ketë Tikveshin nga Kavadari.
Skuadra nga Ohri që këtë vit luajti sezonin debutues në Superligën e Maqedonisë, kërkon që të bëjë të vetin trofeun e Kupës për herë të parë në histori.
Para finales së madhe që do të luhet nesër, nga tabori i ekipit shqiptar kanë folur trajneri Srgjan Zaharievski dhe kapiteni Kostadin Zahov.
“Ndryshe nga Tikveshi, ne jemi një klub i ri që ekziston prej disa vitesh, ky është viti i parë i Voskës në Ligën e Parë dhe arritëm menjëherë në një finale historike, që është një sukses i madh. E përfunduam kampionatin në vendin e dëshiruar, kështu që tani do të luajmë kundër Tikveshit në Kupën e Maqedonisë. Ata kane pasur paraqitje shumë të mira në sezonin pranveror dhe dua t’i përgëzoj për vendin e katërt në tabelë që është një arritje e madhe për Tikveshin. Ata po luajnë mirë, por ne ende jemi në formë të mirë, kemi qenë të pamposhtur për një kohë të gjatë dhe kemi ardhur në Shkup për të garuar dhe fituar Kupën e Maqedonisë. Një herë kam marrë pjesë në finale si trajner i Metalurgut dhe kemi humbur me Rabotniçkin. Shpresoj që tani me Voska Sport të jemi më të suksesshëm dhe të arrijmë synimet tona”, ka thënë në konferencën për shtyp trajneri i Voska Sport, Srgjan Zaharievski.
Ndërkohë Kostadin Zahov që më herët e ka fituar këtë trofe edhe me Shkëndijën e Tetovës, është shprehur se është një emocion tjetër, duke shpresuar që ta fitoj Kupën edhe me Voskën.
“Pres një ndeshje të mirë. Tikveshi është një ekip cilësor, luan futboll sulmues dhe e meriton të jetë këtu. Edhe ne kemi pritshmëritë tona nga ndeshja për trofe. Është shumë ndryshe nga eksperiencat e mia të mëparshme në gara të tilla. Ndoshta edhe një sfidë shumë më e madhe. Shpresoj që të arrijmë kupën. Jemi afër kupës, por finalja duhet luajtur në mënyrën më të mirë të mundshme”, ka thënë Zahov.
Nga ekipi i Tikveshit ka folur tekniku i skuadrës Gjorgji Mojsov, i cili ka vlerësuar ekipin e Voskës, por ka thënë se fituesi do të vendoset nga detajet.
“Kur jemi tashmë në finale, sigurisht që jemi këtu për ta fituar. Nuk do të jemi modestë, duam të fitojmë kupën. Besoj se lojtarët e mi do të jenë sa më të motivuar dhe do ta mbyllim këtë sezon në mënyrën më të mirë të mundshme. Fituesi mund të vendoset nga një moment, gabim apo detaj i një futbollisti të caktuar”, ka thënë Mojsov.
Finalja e Kupës së Maqedonisë së Veriut ndërmjet Tikveshit dhe Voska Sport do të luhet nesër në stadiumin “Todor Proeski” në Shkup, duke nisur nga ora 19:00. /Telegrafi/
Lufta Prigozhin - Putin
Më shumëKonfirmohen pesë skuadrat me të cilat Anglia mund të përballet në fazën tjetër të Euro 2024
Arsyeja pse Danimarka përfundoi mbi Slloveninë përkundër pikëve dhe golaverazhit të njëjtë
Derisa Serbia viktimizohet në UEFA, huliganët e tyre përleshen masivisht me policinë gjermane
Shpërthejnë polemikat në Euro 2024, ka dyshime për kurdisjen e një ndeshje
Sot luhen katër ndeshjet e fundit të fazës së grupeve në Euro 2024, vëmendja në Grupin E
Arrihet marrëveshja: Chelsea transferon sensacionin e Barcelonës
Shitet banesa në Fushë Kosovë në një vendodhje perfekte – 80.5m², çmimi 62,000Euro! ID-254
Ideale për zyre – në qendër të Prishtinës lëshohet banesa me qira ID-253
Krijo hapësirën tënde të biznesit – zyre me qira te 4 Llulat – 300€/muaj ID-252
Ofertë e veçantë – vila në Brezovicë ofrohet me zbritje ID-246
Një jetë e re fillon këtu – banesa e gatshme 2+1 në rrugën ‘Gazmend Zajmi’ ID-251
Më të lexuarat
Derisa Serbia viktimizohet në UEFA, huliganët e tyre përleshen masivisht me policinë gjermane
Arsyeja pse Danimarka përfundoi mbi Slloveninë përkundër pikëve dhe golaverazhit të njëjtë
Arrihet marrëveshja: Chelsea transferon sensacionin e Barcelonës
Ishte cilësuar si armë sekrete, droni nënujor i ushtrisë amerikane shfaqet ‘befasisht’ në imazhet e Google Earth
Përvojë e pazakontë, 28-vjeçari nga Çikago iu nënshtrua transplantit të veshkës – gjatë tërë ndërhyrjes kirurgjikale qëndroi i zgjuar
Lajm i mirë për mërgimtarët nga Zvicra dhe Gjermania që planifikojnë të vijnë në Kosovë