Voska Sport fiton gjysmëfinalen e parë ndaj Makedonija GJP

Skuadra shqiptare nga Ohri, Voska Spor ka fituar ndeshjen e parë gjysmëfinale të Kupës së Maqedonisë së Veriut, duke mundur Makedonija Gjorçe Petrovin me rezultatin 2:0.

Fituesi i këtij takimi u zgjidh për dy minuta, kur në të 38-të Bajrami realizoi golin e parë për ekipin shqiptar, duke çuar në avantazh prej 1:0, ndërsa vetëm një minutë më vonë Georgiev rriti epërsinë për 2:0.

Pjesa e parë u mbyll me këtë rezultat, ndërsa edhe në fraksionin e dytë nuk kishte ndryshime edhe përkrahë disa tentativave, por shifrat mbeten të njejta, ku në fund Voska doli fituese dhe hedh një hap drejt finales së madhe.

Për Voska Sport kjo është historike, pasi për herë të parë luan në këtë fazë të Kupës dhe me rezultatin e sotëm është afër që të shkruaj edhe një faqe tjetër të historisë së saj, për tu kualifikuar në finale për herë të parë.

Ndeshja e kthimit gjysmëfinale ndërmjet Voskës dhe Makedonija Gjorçe Petrovit do të luhet me 17 prill në Shkup.

Kujtojmë se në gjysmëfinalen tjetër të luajtur ditën e djeshme, Shkupi barazoi pa gola me Tikveshin. /Telegrafi/