Volkswagen i hapur për ndërtimin e pajisjeve ushtarake për ushtrinë gjermane

Volkswagen ka njoftuar se është gati të shqyrtojë prodhimin e pajisjeve për ushtrinë gjermane si pjesë e përpjekjeve evropiane për armatim, shkruan The Telegraph.

Oliver Blume, drejtor ekzekutiv i prodhuesit më të madh evropian të veturave, tha se kompania nuk është kontaktuar ende nga partnerët e mundshëm, por se ata janë të gatshëm të “shqyrtojnë konceptet”, transmeton Telegrafi.

Komentet e tij vijnë në një kohë kur zhvendosja drejt armatimeve gjermane – e nxitur nga frika se Shtetet e Bashkuara po tërheqin mbështetjen nga kontinenti – ka bërë që prodhues të tillë si Rheinmetall dhe KNDS Group të riorganizojnë fabrikat e pjesëve të automjeteve për të prodhuar armë.

Sipas ekonomistëve, fabrikat e veturave mund të kursejnë kapacitet pasi eksportet gjermane të veturave janë përgjysmuar nga kulmi i tyre para Covid-19.

I pyetur dje nëse VW, e cila përdorte fabrikën nën kapacitet, ishte e hapur për prodhimin e pajisjeve ushtarake, Blume tha se ekziston një mundësi për këtë, shkruan The Telegraph.

“Së pari, mendoj se, duke pasur parasysh situatën aktuale gjeopolitike, vendimet që po shohim tani në Gjermani dhe në Evropë janë të duhurat, në kuptimin që duhet të investojmë më shumë për të qenë sërish të sigurt”, shtoi ai.

“Ne nuk jemi në diskutime konkrete se çfarë mund të bëjë Volkswagen. Mendimi im është se nëse do të ekzistonte mundësia e prodhimit të automjeteve ushtarake në të ardhmen, do të duhej të shqyrtonim konceptet”, theksoi ai, duke shtuar se gjithçka është vetëm një pyetje e hapur tani për tani.

“Ne e kemi bërë këtë në të kaluarën. Grupi Volkswagen ka ekspertizë automobilistike. Ne jemi të gatshëm të ofrojmë konsulencë dhe këshilla. Por se ku jemi tani është vetëm një pyetje e hapur dhe iniciativat do të drejtohen nga industria e mbrojtjes më shumë se çdo gjë tjetër”, tha për Blume.

Sipas The Telegraph, kërkesa e shtuar e shkaktuar nga perspektiva e armatimeve evropiane ka rritur aksionet e kompanive gjermane të mbrojtjes ndërsa ato rrisin prodhimin.

Në këtë sfond, disa fabrika veturash në Gjermani janë duke u përshtatur për prodhimin e armëve, ndërsa prodhuesit evropianë luftojnë në një treg që nuk është rikuperuar në nivelet e para Covid-it.

Sander Tordoir, kryeekonomist në Qendrën për Reformën Evropiane, tha se prodhimi i pajisjeve ushtarake mund të sigurojë një “linjë të re biznesi” për prodhuesit e automjeteve, shitjet e të cilëve kanë rënë.

“Premtimet për të rritur kërkesën e konsumatorëve gjermanë duke lehtësuar rregullat e buxhetit të “frenimit të borxhit” dhe duke nisur stimulimin e qeverisë nuk ka gjasa t’i kthejnë fabrikat në kapacitetin e plotë”, shtoi ai.

“Ata mund t’i bëjnë të dyja. Gjermania ka humbur gjysmën e eksporteve të saj neto të makinave, kështu që ka shumë kapacitete të papërdorura për të rritur prodhimin e automjeteve elektrike dhe pajisjeve ushtarake”, tha Tordoir. /Telegrafi/