Vlerat e larta të manganit në liqenin e Badovcit, përplasje mes PDK-së e LVV-së në komision

Prezenca e lartë e vlerave të manganit në ujin e liqenit të Badovcit, ka shkaktuar përplasje në mbledhjen e Komisionit për Mjedis, Ushqim, Bujqësi, Planifikim dhe Zhvillim.

Deputetja e PDK-së, Ganimete Musliu ngriti shqetësime rreth kësaj çështje, duke kërkuar që Inspektorati të inspektojë të gjitha lokalet dhe restorantet e gastronomisë që furnizohen me ujë nga ky liqe.

“Shqetësim i qytetarëve është çështja e helmimit të ujit të Badovcit me mangan, ku përveç njoftimit që bëhet unë mendoj që duhet të sensibilizohet më shumë opinoni. Nuk mjafton një cisternë me iu dërguar ujë qytetarëve. Duhet të inspektohen restorantet, kafiteritë që shërbehen me ujin e Badovcit. Jemi duke e dërguar me apo pa vetëdije qytetarin drejt një katastrofe të përgjithshme”, ka thënë Musliu.

Pas kësaj ka reaguar kryetarja e këtij komisioni, Fitore Pacolli duke thënë se nuk kanë kompetencë që të falsin për cilësinë e ujit, por vetëm që qytetarët duhet që t’i adresohen thirrjeve të IKShPK-së.

“Ne si Komision nuk na takon që ta marrim përsipër cilësinë  e ujit, IKSHPK i njofton qytetarët. Sa i përket dhënies së ujit nëpër kafiteri, unë kam rastistë që ato kafiteri që shërbehen nga Badovci kanë thënë që nuk pihet uji dhe nuk ta kanë shërby. Ne si Komision nuk e përcaktojmë cilësinë e ujit”, tha Pacolli.

Por deputetja Musliu ka insistuar sërish që të bëhet inspektimi në lokalet dhe restorantet e gastronomisë, duke thënë se aty ushqimet dhe pijet përgatiten nga uji i Badovcit.

“Të gjitha lokalet që furnizohen me këtë ujë shërbejnë kafe, qaj, supë. Secili institucion duhet të alarmohet, të inspektohen gastronomi ku kanë kyçje në Badovc. Shteti duhet të asistojë të ofrojë mundësi të furnizimit me ujë, kërkesa jem është për Inspektoratin. Të vetëdijesohemi që mos ta përdorim këtë ujë”, ka thënë Musliu.

Deputeti i LVV-së, Salih Zyba kërkoi nga kryetarja e komisionit që t’ia ndërpresë fjalën deputetes Musliut me arsyetime se po përdorë mbledhjen për qëllime të tjera.

Në këtë rast ka reaguar Musliu duke i thënë Zybës që “ti ski drejt me ma ndërpre fjalën. Le të jetë hera e fundit. Mbylle gojën mos më ndërhy”.

Zyba pastaj reagoi sërish duke i thënë Musliut “mos ma luaj naiven, po flet tema jashtë rendit të ditës”.  /Telegrafi/