Vitali Klitschko konfirmon se është ndarë nga gruaja e tij pas 26 vitesh martesë

Legjenda e boksit të peshave të rënda, Vitali Klitschko është ndarë nga gruaja e tij prej 26 vitesh, Natalia.

Por 51-vjeçari ka këmbëngulur se dyshja kanë ende një “marrëdhënie shumë të mirë”, shkruan The Sun.

Klitschko është kryebashkiak i kryeqytetit ukrainas Kiev, ku ai ka punuar pa u lodhur që nga pushtimi i Rusisë në fillim të shkurtit.

Ndërkohë ish-modelja dhe muzikantja Natalia, 48 vjeçe, jeton prej vitesh në Gjermani.

Dyshja u martuan në vitin 1996 pas takimit të parë të raportuar në kryeqytetin ukrainas, edhe pse ata janë ndarë prej disa kohësh.

Dhe Klitschko ka konfirmuar se ata tani kanë bërë zyrtarisht kërkesën për divorc.

Ai tha për gazetën gjermane Bild: “Kemi bërë kërkesë për divorc së bashku sepse kemi vite që jetojmë të ndarë dhe tani duam ta zyrtarizojmë”.

“Ne kemi një marrëdhënie shumë të mirë dhe e respektojmë njëri-tjetrin, por prej kohësh jetojmë të ndarë në qytete të ndryshme”.

Ish-çifti kanë tre fëmijë së bashku – Yegor-Daniel, 22, Elizabeth-Victoria, 19 dhe Max, 16.

Natalia është gjysmë gjermane, gjysmë ukrainase dhe është gjithashtu mësuese e jogës.

Vitali ende thuhet se i shkruan asaj çdo mëngjes për t’i thënë se është i sigurt në Kiev.

Natalia pretendohet se ka ndihmuar në kujdesin e refugjatëve që kanë ikur nga Ukraina e shkatërruar nga lufta në gjashtë muajt e fundit.

Vitali u përfshi në politikë përpara se të tërhiqej nga sporti dhe ka qenë kryebashkiak i Kievit që nga viti 2014.

Krahas vëllait dhe shokut të tij ikonës së boksit Wladimir, Vitali u zotua se ishte i gatshëm të vdiste për vendin e tij duke luftuar kundër pushtuesve rusë.

Dyshja morën armët për të mbrojtur Kievin nga ushtarët rusë kur pushtimi kishte në shënjestër kryeqytetin ukrainas në fillim të këtij viti. /Telegrafi/