Visa dhe MasterCard pezullojnë punën në Rusi

Gjigantët amerikanë të pagesave Visa dhe MasterCard kanë njoftuar se kanë pezulluar punën në Rusi për shkak të agresionit ushtarak të kësaj të fundit në Ukrainë.

Visa me anë të një deklarate tha se do të ndërpresë transaksionet “gjatë ditëve në vijim” dhe si rrjedhojë kartelat e lëshuara në Rusi nuk do të funksionojnë jashtë vendit, si dhe kartelat e huaja të lëshuara në Rusi.

Shefi ekzekutiv i kompanisë së pagesave dixhitale, Alfred Kelly tha se janë të detyruar të veprojnë këtë mënyrë, pas pushtimit të paprovokuar të Ukrainës nga Rusia.

“Na vjen keq për ndikimin që kjo do të ketë te kolegët tanë të çmuar dhe te klientët, partnerët, tregtarët dhe mbajtësit e kartave që u shërbejmë në Rusi. Kjo luftë dhe kërcënimi i vazhdueshëm ndaj paqes dhe stabilitetit kërkon që ne të përgjigjemi në përputhje me vlerat tona”, tha Kelly.

Po ashtu edhe MasterCard lëshoi një njoftim të ngjashëm, duke deklaruar se kartat e lëshuara nga bankat ruse nuk do të mbështeten më nga rrjeti i saj.

Lexo po ashtu MasterCard bllokon transaksionet nga Rusia

Kompania shtoi se çdo kartelë e lëshuar jashtë vendit nuk do të funksionon në Rusi.

“Për më shumë se një javë, bota ka parë ngjarjet tronditëse dhe shkatërruese që rezultuan nga pushtimi rus i Ukrainës. Kolegët tanë, klientët tanë dhe partnerët tanë janë prekur në forma të ndryshme, që shumica prej nesh nuk mund ta imagjinonin”, thuhet në njoftim.

Qeveria ukrainase u kishte bërë thirrje parë kompanive financiare që të pezullonin funksionimin e tyre në Rusi.

Forcat ruse kanë nisur sulmet në Ukrainë me urdhër të presidentit Vladimir Putin.

Paraprakisht, ai i ka shpallur të pavarura dy rajone separatiste në lindje të Ukrainës. Në vitin 2014, Rusia ka aneksuar edhe Gadishullin ukrainas të Krimesë dhe ka nxitur lëvizjen separatiste në Ukrainën lindore. Perëndimi i ka dënuar ashpër veprimet e Rusisë, duke i cilësuar si shkelje të sovranitetit dhe integritetit territorial të Ukrainës. /Telegrafi/ /Telegrafi/