Vetëm 24 gra të punësuara në bordet e ndërmarrjeve publike

Nga 159 anëtarë të bordeve në 31 ndërmarrje publike, 135 prej tyre janë burra dhe 24 gra, ndërsa vetëm pesë borde kryesohen nga gratë.

Kështu është thënë me rastin e prezantimit të analizës “Përfaqësimi i grave në bordet e ndërmarrjeve publike dhe agjencive të pavarura” nga Instituti GAP, sipas së cilës del se ka një pjesëmarrje shumë të ulët të grave në pozita menaxheriale në ndërmarrje publike, institucione dhe agjenci të pavarura, me vetëm 13 për qind të grave në moshë pune të punësuara.

Sipas kësaj analize, nga 184 anëtarë të bordeve në institucione dhe agjenci të pavarura, 149 janë burra, 30 janë gra dhe për 5 anëtarë nuk ka informacion.

Ministri i Zhvillimit Ekonomik, Valdrin Lluka, ka thënë se numri i grave në ndërmarrjet publike qendrore është edhe më i ulët, ndërsa pritet që përmes nxjerrjes të një Ligji të ri për Ndërmarrjet Publike të ketë mundësi të bëhen ndryshimet sa i përket barazisë gjinore.

“Ndërmarrjet Publike Qendrore që ne i kemi në menaxhim si Ministri e Zhvillimit Ekonomik, kanë vetëm 13 për qind gra. Raporti juaj ishte diku rreth 15 për qind, mirëpo nëse i marrim ato qendrore kemi edhe më pak. Hiq më larg se dje kemi nënshkruar një koncept-dokument ku e kemi dërguar në Qeveri për aprovim. Një koncept-dokument, i cili kërkon që Ligji për Ndërmarrjet Publike të nxirret krejtësisht i ri dhe aty e kemi të paraparë edhe pjesën e barazisë gjinore Kështu që e kemi një mundësi perfekte ku mund ta bëjmë këtë ndryshim, të gjithë së bashku”, ka thënë ai.

Jeton Mehmeti nga Instituti GAP, ka thënë se pavarësisht se situata e arsimimit të gruas në Kosovë është përmirësuar, ka një numër shumë të ulët të grave të punësuara. Sa i përket numrit të ulët të grave në borde, Mehmeti tha se kjo nuk ka se si të jetë ndryshe kur edhe komisionet përbëhen 98 për qind nga burrat.

“Mbi 95 për qind e pozitave të larta në Qeverinë e Kosovës udhëhiqen nga burrat, 82 për qind e anëtarëve të bordeve të ndërmarrjeve publike janë burra. Në përgjithësi, gratë janë më pak të punësuara në sektorin publik dhe shumë më pak të përfaqësuara në pozita të larta udhëheqëse. Në përgjithësi, punësimi i njerëzve në ndërmarrje publike sidomos në aspektin e bordeve të ndërmarrjeve publike, ka pasur telashe. Agjencia kundër Korrupsionit ka hasur në 17 raste ku anëtarët e bordeve janë zgjedhur në kundërshtim me ligjin për ndërmarrjet publike”, tha ai.

Ndryshe, tri organet kolegjiale që kryesohen nga gratë janë: Komisioni Qendror i Zgjedhjeve, Paneli Zgjedhor për Ankesa dhe Parashtresa dhe Gjykata Kushtetuese e Kosovës. /Telegrafi/