Veseli premton zgjidhjen e problemit të punëtorëve të Fabrikës së Tubave

Kryetari i Kuvendit të Republikës së Kosovës, Kadri Veseli, ka takuar sot udhëheqësit e ish-punëtorëve të Fabrikës së Gypave në Ferizaj, të cilëve u printe Ali Shabani. Veseli në këtë takim u tha atyre se do të angazhohet për zgjidhjen e çështjes së tyre, në mënyrë që ata të marrin paratë që u takojnë nga privatizimi i kësaj ndërmarrjeje.

Siç thuhet në një komunikatë, kryetari Veseli u informua në mënyrë të detajuar për tërë procedurat e deritashme të Fabrikës së Gypave, deri në vendimet e Agjencisë Kosovare të Privatizimit, që prek 912 punëtorë të kësaj fabrike.

E, Shabani prezantoi tërë dokumentacionin, duke filluar nga vendimi i Gjykatës në Ferizaj, më 2001, propozimin e përmbarimit të këtij vendimi, Aktvendimin e Gjykatës së Qarkut në Prishtinë, Aktvendimin e Dhomës së posaçme të Gjykatës Supreme, deri në Aktgjykimin e Gjykatës Kushtetuese të vitit 2010, sqarimet e kësaj gjykate, si dhe vendimin për mos përmbarimin e këtij vendimi të Gjykatës kushtetuese.

Ndërsa, kryetari Veseli theksoi rëndësinë e Vendimit të Kuvendit të Republikës së Kosovës, të Legjislaturës IV, i datës 19 mars 2014, dedikuar Fabrikës së Gypave, duke theksuar se nuk mund të merret me komentimin e kësaj çështjeje kur tashmë një vendim i Kuvendit ekziston. Kryetari Veseli ka shtuar se vendimet e gjyqit nuk do të duhej të ishin temë e rivlerësimit dhe theksoi se do të angazhohet për zgjidhjen e kësaj çështjeje.