Varësia për të bërë ‘shopping’ në internet është problem i shëndetit mendor

Varësia për të blerë në internet duhet të njihet si çrregullim i vërtetë mendor, thonë psikoterapeutët.

Hulumtuesit thonë se mund t’i detektojnë simptomat e dallueshme dhe karakteristikat e këtij çrregullimi dhe tregojnë se si ndikojnë në mendje, transmeton Telegrafi.

Çrregullimi i blerjes apo shopping-ut ka qenë i njohur për dekada të tëra, por ekspertët thonë se po merr kuptim të ri në epokën e internetit dhe tani prek më shumë njerëz (1 në 20).

Personat e fiksuar pas blerjeve në internet mund të përfundojnë në borxhe, duke u fjalosur me të afërmit dhe duke e humbur krejtësisht vet-kontrollin.

Dr. Astrid Muller, psikoterapeute gjermane, ka deklaruar se është koha që këtë çrregullim ta ndajmë si problem të shëndetit mendor dhe të mbledhim më shumë njohuri për blerjet në internet.

Në studimin që Muller e ka kryer me kolegët e saj, kanë zbuluar se pacientët që kërkojnë ndihmë për varësinë që e kanë për të blerë në internet kanë nivele më të larta të depresionit dhe ankthit.

Madje, hulumtuesit thonë se edhe të rinjtë janë duke shfaqur shenja të çrregullimit të shopping-ut apo blerjeve në internet.

Ky problem, sipas ekspertëve, shkakton humbje të vet-kontrollit, stres ekstrem, probleme tjera psikiatrike, vështirësi në lidhje, borxhe, etj.

Vlen të ceket se hulumtimi është publikuar në revistën “Comprehensive Psychiatry”. /Telegrafi/