Vance: Kam besim se do të arrihet një marrëveshje për TikTok para 5 prillit

Që TikTok të jetë funksional në SHBA  dhe të shmangë një ndalim, pronari i tij aktual, ByteDance i Kinës, duhet të gjejë një blerës për aplikacionin përpara datës 5 prill.

Ky blerës duhet të jetë një kompani me seli jashtë Kinës dhe disa kompani amerikane mund të kenë interes për aplikacionin.

Në vitin 2019 gjatë mandatit të tij të parë, kur presidenti Donald Trump nuk ishte adhurues i TikTok, kompanitë amerikane si Walmart, Oracle dhe Microsoft u konsideruan blerës të mundshëm.

Në gusht 2020, Microsoft u raportua se ishte në bisedime serioze me ByteDance mbi TikTok, shkruajnë mediat e huaja, përcjell Telegrafi.

Dhe Trump përfundimisht humbi interesin për aplikacionin pasi zgjedhjet presidenciale të vitit 2020 u bënë shqetësimi i tij i parë.

Megjithatë, gjatë zgjedhjeve presidenciale të 2024, Trump ndryshoi mendim, pasi aplikacioni ndihmoi në rritjen e numrit të votuesve të tij.

Projektligji i nënshkruar nga presidenti Joe Biden në prill 2024 i dha ByteDance kohë deri më 19 janar, një ditë para inaugurimit të dytë të Trumpit, për të gjetur një blerës.

Mirëpo, Trump nënshkroi një urdhër ekzekutiv në ditën e tij të parë të kthimit në Zyrën Ovale që i dha TikTok 75 ditë shtesë.

Ky afat skadon më 5 prill dhe kjo është arsyeja pse zëvendëspresidenti amerikan JD Vance tha se ai ka besim se një marrëveshje për të mbajtur funksionimin e TikTok në SHBA do të hyjë në fuqi deri më 5 prill.

Gjatë një interviste me NBC News, Vance tha se Trump i kërkoi atij të ndihmonte për të arritur një marrëveshje.

Raportohet se zëvendëspresidenti po punon me këshilltarin e sigurisë kombëtare Michael Waltz për të gjetur një pronar të ri për aplikacionin. /Telegrafi/