Vaksina kundër gripit sezonal, Gashi: Duhet të merret dy javë pas marrjes së dozës së dytë të vaksinës antiCOVID

Sot ka filluar vaksinimi kundër gripit sezonal e siç u pa në sallën “1 Tetori” në Prishtinë ku edhe po vaksinohen qytetarët ka interesim për të marrë këtë vaksinë.

Drejtori i Shëndetësisë në komunën e Prishtinës, Bujar Gashi në një prononcim për Telegrafin ka bërë të ditur që këtë vaksinë mund ta marrin edhe qytetarët të cilët para dy jave që janë vaksinuar me dozën e dytë kundër COVID-19.

“Vaksinën kundër gripit sezonal mund ta marrin qytetarët pas dy jave që e kanë marrë dozën e dytë të vaksinës kundër COVID-19”, tha Gashi.

Kurse më përpara procesi i vaksinimit kundër gripit sezonal është kryer në QKMF-të përkatëse, tani ky proces po zhvillohet në sallën “1 Tetori” aty ku jepen edhe vaksinat antiCOVID.

“Kjo vaksinë krijon imunitet për 4 lloje të viruseve. Kurse vaksinimi ka filluar në sallën 1 Tetori për arsye të sistemit të ri në futjen e të dhënave, e cila është pak më e komplikuar në sallën 1 ‘Tetori’. Rrjeti dhe sistemi janë funksional dhe nën mbikëqyrjen e IT-së”, shtoi ai.

Po ashtu Gashi thotë që kanë në dispozicion vaksina të mjaftueshme për tu vaksinuar qytetarët.

“Në dispozicion kemi 14,000 vaksina kundër gripit sezonal dhe ky numër është i mjaftueshëm”, shtoi tutje.

Kurse grupet që kanë më shumë prioritet për tu vaksinuar me këtë vaksinë janë punëtorët shëndetësorë, qytetarët e moshuar, gratë shtatzëna dhe qytetarët me sëmundje kronike. /Telegrafi/