UEFA fton Eriksenin, gruan e tij dhe gjashtë mjekët që ia shpëtuan jetën në finalen e Euro 2020

UEFA i ka ftuar për ndeshjen finale në Wembley, mesfushorin danez Christian Eriksen dhe stafin mjekësor që e ndihmuan në shpëtimin e jetës së tij, pas një arresti kardiak që kishte në fushë .

UEFA ka treguar se Eriksen, gruaja e tij dhe gjashtë mjekë janë ftuar në finale, por nuk ka ende asnjë konfirmim që ai do të merrte pjesë.

Një nga mjekët, Peder Ersgaard, ka thënë se është i nderuar që mori një ftesë VIP nga presidenti i UEFA-s, Aleksander Ceferin.

“Unë jam i ngazëllyer, si një fëmijë në prag të Krishtlindjes. Jam shumë krenar për përpjekjet e mia, por edhe për të gjithë ekipin. Nuk ishte një punë e një njeriu”.

“Shpresoj të shoh Danimarkën kundër Italisë. Kjo do të ishte vërtet e madhe. Thjesht imagjinoni nëse ata bëhen kampionë të Evropës”, ka thënë Ersgaard  për revistës Fagbladet FOA.

Eriksen u rrëzua në fushën në “Parken Stadium” në pjesën e parë kundër Finlandës. Futbollisti danez ka qenë në rrezik për jetën, ndërsa në spital iu vendos një defibrillator.

Tani është duke e vazhduar rikuperim në shtëpi. /Telegrafi/