Tuchel e pranon se Rudiger do të jetë një humbje e madhe për Chelsean

Trajneri i Chelseat, Thomas Tuchel e ka pranuar se Antonio Rudiger do të largohet në fund të sezonit, ndërsa gjermani është afër kalimit te Real Madridi.

Kontrata e qendërmbrojtësit gjerman me Chelsean skadon në fund të këtij sezoni dhe sipas gazetarit Fabrizio Romano, Rudiger ka vendosur të shkëmbejë kryeqytetin anglez me kryeqytetin spanjoll.

Largimi i tij, të paktën, është konfirmuar edhe nga trajneri i Bluve, Thomas Tuchel.

Lexo po ashtu Dalin detajet e kontratës së Rudigerit te Real Madridi – pasurohet edhe më shumë gjermani

Trajneri gjerman, i cili udhëhoqi Chelsean drejt triumfit në Ligën e Kampionëve sezonin e kaluar pasi mori drejtimin në mes-sezonit nga Frank Lampard, pranoi se Rudiger do të jetë një humbje e madhe.

“Unë nuk mendoj se dikush e pëlqen atë (largimin). Ai u jep besim të gjithëve. Duhet ta pranojmë, do ta pranojmë. Do të ketë jetë në Chelsea pa Tonin”, ka thënë Tuchel.

Rudiger pritet të nënshkruajë një marrëveshje katërvjeçare me Real Madridin, i cili aktualisht është 15 pikë më shumë se vendi i dytë në krye të La Ligës dhe në gjysmëfinalen e Ligës së Kampionëve.

29-vjeçari, i lindur në Berlin, iu bashkua Chelseat nga Roma në vitin 2017. Që atëherë ai ka fituar Kupën FA, Ligën e Kampionëve, Ligën e Evropës, Kupën e Botës për Klube dhe Superkupën Evropiane në Stamford Bridge.

Ai ka luajtur 196 ndeshje për klubin londinez dhe gjithashtu ka fituar 50 paraqitje për ekipin kombëtar gjerman. /Telegrafi/