Triumf për Golden State, Chicago shkakton befasi

Golden State Warriors dhe Houston Rockets kanë dhuruar spektakël në sfidat e para çerekfinale të Konferencës së Perëndimit, kurse në Lindje nuk ka zhgënjyer Washington Wizards, teksa befasia e mbrëmjes mban emrin e Chicago Bulls.

Ndeshje e ekuilibruar në Oracle Arena deri në çerekun e katërt, sepse në 12-minutëshin e fundit, Golden State shpërtheu dhe falë një avantazhi të pjesshëm 33-21, arriti të mposhte Portland Trail Blazzers me shifrat përfundimtare 121-109. McCollum dhe Lillard të cilët shënuan respektivisht 41 dhe 34 pikë, bënë gjithçka për të evituar humbjen e skuadrës nga Oregoni, por nuk ja dolën dot sepse përballë kishin një skuadër të tërë yjesh, me Golden State që mori kryesimin e serisë 1-0. Durant është rikthyer më i fortë se kurrë për të ndihmuar skuadrën nga Oakland të fitojë një tjetër titull në NBA. Ish lojtari i City Thunder ishte basketbollisti më i mirë mbi parket për formacionin e trajnerit Steve Kerr pasi arriti të realizonte 32 pikë.

Në sfidën tjetër të Konferencës së Perëndimit, James Harden fitoi duelin e parë ndaj Rusell Westbroook. Në Toyota Center në Texas, Houston Rockets kaloi me rezultatin e thellë 118-87, Oklahoma City Thunder. Një meritë të jashtëzakonshme në këtë fitore të skuadrës teksane e kishte padiskutim James Harden autori i një paraqitjeje super. Ylli i Rockets koleksionoi në total, 37 pikë, nëntë asistime dhe shtatë kërcime, duke lënë deri diku në hije ish shokun e skuadrës dhe rivalin e tij më të madh në këtë sfidë Rusell Westbrook, autori i ndeshjeje normale të cilën e mbylli me 22 pikë, shtatë asistime dhe 11 kërcime, transmeton SuperSport. Me avantazhin 1-0 në favor të Rockets edhe ndeshja e dytë e këtij dueli të ‘play-offit’ do të luhet në Houston.

Boston Celtics e përfundoi sezonin e rregullt në vendin e parë për të pasur avantazhin e fushës ndaj çdo skuadre tjetër në Lindje, por 17-herë kampionët e NBA kurrë nuk e kishin menduar se do të hasnin kaq shumë vështirësi përballë Chicagos që u kualifikua në ‘play-off’ me shumë vështirësi. Në TD Garden, miqtë nga Ilionois bënë surprizën e madhe duke mposhtur Bostonin me rezultatin 106-102. Jimmy Butler me 30 pikët e tij bëri të pavlefshme paraqitjen fantastike të Isaiah Thomas i cili ishte pikëshënuesi më i mirë i sfidës me 33 pikë .Vetëm 48 orë pasi motra e tij humbi jetën në një aksident rrugor Isaiah Thomas tregoi se është një kampion i madh duke zbritur mbi parket dhe duke zhvilluar një tjetër paraqitje të shkëlqyer . Me emra të tillë si Butler, Wade, Rondo e Mirotic në rradhët e Bulls-ave, Bostoni do ta ketë shumë të vështirë të përmbysi tashmë Chicagon që kryeson serinë 1-0.

E nisi në mënyrën më të mirë fazën ‘play-off’ edhe Washington Wizards që në kryeqytet mposhti 114-107, Atlanta Hawks falë edhe liderit të ekipit John Wall, i cili koleksionoi 31 pikë 14 asistime dhe katër kërcime në këtë sfidë.