Tri barazime radhazi në Bundesliga, Salihamidzic paralajmëron Nagelsmann pas turbulencave në skuadër

Te Bayern Munich diçka nuk shkon siç duhet, pasi në tri ndeshjet e fundit të Bundesligës kanë marr tre barazime dhe për këtë ka folur drejtori sportiv, Hasan Salihamidzic.

Salihamidzic po përpiqet të kalojë një pjesë të përgjegjësisë te trajneri Julian Nagelsmann, ndryshe nga deklaratat e Thomas Muller, i cili ishte kritik ndaj vetes dhe bashkëlojtarëve të tij pas barazimit me Stutgartin (2-2).

“I thashë trajnerit tonë: “Më mirë të marr barazim edhe disa herë, në vend që të kisha shumë lojtarë të pakënaqur në ekip”, ka thënë Salihamidzic.

Përkatësisht, për ndeshjen e fundit ndaj Stutgartit, Nagelsmann la në stol një numër të madh yjesh që kishin statusin e titullarit në numrin më të madh të ndeshjeve.

Këtë vendim e ka marrë pasi nesër luan me Barcelonën në Ligën e Kampionëve, por mediat gjermane nga fjalët e Salihamidzic kanë nxjerrë përfundimin se lojtarët nuk janë shumë të kënaqur me Nagelsmann.

Disa Individë dyshohet se janë të pakënaqur me rolet në ekip që u janë caktuar dhe Nagelsmann praktikisht e ka problemin më të madh kur të gjithë janë të shëndetshëm për shkak të konkurrencës së ashpër në çdo pozicion.

Sigurisht që nuk është e lehtë për trajnerin e Bayernit për momentin për shkak të nervozizmit që tashmë është krijuar në klub dhe gjithçka mund të ndryshojë me një fitore të mundshme dhe një lojë të mirë ndaj Barcelonës. /Telegrafi/