Tre të vdekur, gjashtë shtete pa energji elektrike – pasi stuhia vdekjeprurëse e dimrit dhe tornadot goditën disa pjesë të SHBA-së

Një stuhi e ashpër dimri ka lënë një gjurmë shkatërrimi në jug të SHBA-së, duke shkatërruar komunitete dhe duke vrarë tre njerëz në Luiziana.

Moti ka lënë gjithashtu dhjetëra mijëra njerëz pa energji elektrike në gjashtë shtete, shkruajnë mediat e huaja, përcjell Telegrafi.

Në lindje, rreth 11 milionë njerëz në Florida dhe Georgia janë ende duke u përballur me kërcënimin e tornadove.

Në Luiziana, zyrtarët kanë konfirmuar deri më tani tre të vdekur dhe dhjetëra të lënduar si pasojë e stuhisë.

Në një incident, një grua 56-vjeçare pranë New Orleans u vra pasi një tornado shkatërroi shtëpinë e saj.

Komunitetet në të gjithë shtetin raportuan dëme të rënda, duke përfshirë linjat e energjisë elektrike të rrëzuara dhe ndërtesat e shembura.

Në Jefferson Parish – një periferi e New Orleans – zyra e sherifit tha se shtëpitë dhe bizneset në zonë kishin “pësuar dëme katastrofike”.

Një banor i Luizianës, Michael Willis, i tha partnerit amerikan të BBC-së CBS se të qenit afër me një tornado pranë qytetit të Harvey ishte “gjëja më e frikshme” që ai ka përjetuar ndonjëherë.

Tornado “e ngriti atë në ajër” teksa ishte ulur në makinën e tij, ndërsa mbeturinat i thyen xhamin e përparmë.

“Kjo ndodhi shpejt”, tha ai. /Telegrafi/