Trajneri i Dortmundit me kërkesë të çuditshme për Bellinghamin rreth të ardhmes

Trajneri i Borussia Dortmundit, Edin Terzic, i ka bërë thirrje Jude Bellinghamit që të refuzojë interesimin nga gjigantët evropianë dhe të qëndrojë në Gjermani në vitin 2023.

Liverpooli dhe Real Madridi po luftojnë për të siguruar një marrëveshje për reprezentuesin anglez në fund të sezonit 2022/23.

Playmakeri 19-vjeçar ishte një yll në rrugëtimin e Anglisë në Kampionatin Botëror dhe vlera e tij e transferimit është rritur në 150 milionë euro në skuadrën e Bundesligës.

Drejtori Sportiv i Dortmundit, Sebastian Kehl, konfirmoi se klubi nuk është nën presion për të shitur këtë muaj, por komentet e mëparshme nga drejtori ekzekutiv Hans-Joachim Ëatzke lanë të kuptohet gatishmëria e tyre për të bërë një marrëveshje këtë verë.

Hapi i ardhshëm i Bellingham do të jetë një histori e madhe transferimi këtë verë, pa asnjë lëvizje që pritet në afatin e dimrit, por Terzic beson se është më mirë që lojtari të qëndrojë.

“Unë besoj se ne duhet të punojmë për t’i mbajtur këta djem të rinj një vit më gjatë”, sipas raportimeve nga The Athletic.

“Në sezonin tim të parë (si menaxher i përkohshëm), mund të vendosja Jadon (Sancho), Jude dhe Erling (Haaland) së bashku në fushë, por ky ishte viti i tyre i vetëm së bashku”.

“Nëse mund të arrijmë në pikën ku janë dy ose tre vjet të një treshe të tillë, ndoshta mund ta thyejmë barrierën”, ka vazhduar ai.

Bellingham ka deklaruar vazhdimisht dëshirën e tij për të qëndruar në Gjermani deri në fund të 2022/23, por një rikthim në Angli, ose perspektiva për t’u bashkuar me Los Blancos, mund të jetë një faktor i madh për të. /Telegrafi/