Tjetër rast i dhunimit në Kosovë – një vajzë raporton se është keqpërdorur seksualisht në motel

Policia e Kosovës në raportin e së enjtes njoftoi për dy raste të dhunimit.

Sipas njoftimit, njëri rast ka ndodhur në Prishtinë, ku një person ka raportuar në polici se dyshon që dikush ka kryer marrëdhënie seksuale me vajzën e tij.

Ndërsa, rasti tjetër thuhet se ka ndodhur në Ferizaj dhe Prishtinë.

Policia bën të ditur se të mërkurën e 14 shtatorit, një vajzë ka raportuar se para katër viteve ishte mashtruar duke u joshur me para nga një i dyshuar dhe ishte keqpërdorur seksualisht në një motel.

“Ferizaj-Prishtinë NN-NN. Me 14.09.2022 viktima femër kosovare ka raportuar se para katër viteve ishte mashtruar duke  e joshur me para nga i dyshuari mashkull kosovar dhe ishte keqpërdorur seksualisht në një motel”, thuhet në raport.

Ndërsa, një gjë e tillë sipas saj ka ndodhur edhe para dy muajve. Pra, dyshohet se është keqpërdorur seksualisht nga i njëjti person.

“I dyshuari është arrestuar dhe pas intervistimit me vendim të prokurorit, është dërguar në mbajtje”, thuhet tutje në raport.

Rasti i cili është hapur si “Dhunim”, është në procedurë hetimore. /Telegrafi/