Thirrja për bashkëpunim në PD, Alibeajt i përgjigjet Berishës

Grupi Parlamentar i Partisë Demokratike të Shqipërisë nën drejtimin e Enkelejd Alibeajt ka shprehur gatishmërinë për bashkëpunim brenda PD-së në mënyrë që të shkojnë të bashkuar në zgjedhjet e ardhshme lokale.

Në njoftimin e shpërndarë për mediat nga grupi i PD, thuhet se zgjidhje e vetme për t’u përballur me regjimin e Edi Ramës është përballja me një kandidat të përbashkët të PD dhe opozitës në zgjedhje.

“Pas diskutimeve në Grupin Parlamentar të Partisë Demokratike, deputetët në mënyrë unanime shprehën vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar. Në vlerësimin e Grupit Parlamentar të PD zgjidhje e vetme për t’u përballur me regjimin e Edi Ramës në zgjedhjet lokale është bashkimi i çdo zëri opozitar dhe përballja me një kandidat të vetëm të PD dhe opozitës në zgjedhje”, thuhet në deklaratën e grupit të PD.

Grupi Parlamentar i PD-së ka mandatuar Gazment Bardhin për të kontaktuar dhe për të hulumtuar çdo mundësi bashkëpunimi dhe daljes në zgjedhje lokale me një kandidat të vetëm të PD dhe opozitës dhe ka shprehur gatishmërinë për të nisur menjëherë nga puna për të mundësuar bashkëpunimin mes demokratëve në zgjedhjet lokale. /Telegrafi/