Thimonier: Pamjet që pamë dje, nuk janë të një shteti evropian

Ambasadori i Francës në Maqedoni, Christian Thimonier, në një deklaratë për sdk.mk, ka thënë se incidentet e djeshme në Parlamentin e Maqedonisë nuk janë pamje të një parlamenti të shtetit evropian.

“Dje ishte ditë dëshpëruese pasi pamë ngjarje për të cilat mendojmë se ua kemi kthyer shpinën, se nuk ka pasur konsenzus minimal për procedurat për miratimin e ligjeve dhe nuk ka pasur diskutim të civilizuar për tema në interes të qytetarëve. Nuk është e imja të gjykoj, por pamjet që pamë janë gjithçka, përveç pamje të një shteti evropian”, ka thënë Thimonier, përcjell Telegrafi Maqedoni.

Ndërsa edhe eurokomesari për zgjerim dhe fqinjësi të mirë Johannes Hahn, në dhjetor të vitit të kaluar tha se Ligji i gjuhëve nuk është relevant për marrjen e rekomandimeve dhe se pushteti duhet të fokusohet në ligjet më prioritare.

Përndryshe, raporti për Maqedoninë për anëtarësim në BE do të publikohet më 17 prill, ndërsa në qershor pritet vendimi nëse Maqedonia do të merr rekomandime për fillimin e bisedimeve për anëtarësim në BE./Telegrafi/