Thaçi pas bisedës telefonike me Ramën: Kosova dërgon trupa shtesë të FSK-së në Shqipëri

Presidenti i Kosovës, Hashim Thaçi ka thënë se gjendja në Durrës dhe Thumanë të Shqipërisë pas tërmeteve vazhdon të jetë e rëndë.

Thaçi ka thënë se ka përcjellë me vëmendje mbledhjen e Qeverisë së Shqipërisë dhe konstatimin e gjendjes nga kryeministri Rama, dhe se tani shtrohet nevoja urgjente për sanimin e pasojave që të mos rrezikohet asnjë jetë e njerëzve, transmeton Telegrafi.

Presidenti ka thënë se pas bisedës telefonike me kryeministrin Rama, nga sot Kosova dërgon trupa shtesë të Forcës së Sigurisë, të specializuara për sanimin e pasojave dhe konstatimin dhe evidentimin e saktë të shkallës së dëmtimit të ndërtesave në zonat e goditura nga tërmeti.

Ai në shkrimin  e bërë në Facebook ka thënë se kthimi i njerëzve nëpër shtëpi duhet të bëhet në mënyrë të organizuar vetëm pas konstatimit real që shtëpitë dhe banesat të jenë të sigurta dhe të mos ndodhin fatkeqësi të tjera.

Nga tërmetet në Shqipëri deri tani kanë humbur jetën 40 persona, kurse mbi 650 tjerë janë lënduar./Telegrafi/