Tensione në mes Xhaferit dhe opozitës shqiptare gjatë seancës për shtyrjen e regjistrimit

Propozim-ndryshimi i ligjit për regjistrim u rikthye në seancë plenare për votim përfundimtar para deputetëve. Shumë nga deputetët e opozitës shqiptare u paraqitën për të marrë fjalën, duke u nisur, siç thanë ata, nga rëndësia e ligjit.

Tensionimi i situatës solli kërkesën e koalicionit Aleanca për Shqiptarët dhe Alternativa për një pushim 1 orësh. Ligji nuk do të miratohet pa u shterur debati.

Deputeti i Alternativës Skender Rexhepi, vonesën e tyre e arsyetoi me atë se nuk kanë arritur të gjejnë vend për parkim.

“Duhet të merrni parasysh faktin, se nuk kishte vende të parkimit. Deputetët u vonuan, sepse nuk kishin ku të parkoheshin. Këtë duhet ta rregulloni”, tha Rexhepi.

Ndërsa Talat Xhaferi, u tha se obligim i tyre është të vijnë një orë më herët në punë.

“Ejani një orë më herët. Dhe kjo nuk më intereson. Ju jeni të obliguar të vini më herët. Kurse sa i takon pauzës, nëse doni të hani ushqim, shkoni në shtëpi, nuk jam i obliguar të siguroj ushqim. Në ora 16:30 kthehemi në seancës”, tha Xhaferi.