“Telegrafi Local News” projekti më ambicioz në prag të lansimit

Së shpejti në Telegrafi.com do të lansohet “Telegrafi Local News”, e cila pritet të jetë platforma më inovative dhe e para e këtij lloji në Ballkanin Perëndimor, me faqe të dedikuara për shatë rajonet e Kosovës duke siguruar lajme lokale nga të gjitha fushat.

Kjo nismë e re do të bëjë rikthimin e gazetarisë lokale duke kapërcyer kufijtë tradicionalë të raportimit.

Platforma që tashmë ka hyrë në fazën finale dhe pritet të lansohet së shpejti, do të ofrojë jo vetëm lajme ditore nga të gjitha fushat si: ekonomi, biznes, kulturë, sport etj. Platforma do të ketë edhe analiza, profile, opinione e intervista me personalitete të ndryshme dhe reportazhe që pasqyrojnë jetën e komuniteteve lokale, përfshirë arritjet lokale gjithëpërfshirëse.

Përveç kësaj, “Telegrafi Local News” do të shërbejë edhe si një guidë për aktivitete lokale, duke ofruar ide për kohën e lirë si: evente kulturore, sportive dhe hapësira argëtuese. Kjo platformë synon të bëhet burim kryesor për çdo gjë që ndodh në komunitetin lokal, duke lidhur njerëzit me informacione të dobishme dhe të shpejta.

“Telegrafi Local News” synon të aktivizojë një epokë të re në sferën e gazetarisë lokale në Kosovë, duke sjellë një frymë moderne dhe të paanshme.

“Telegrafi Local News” shtrihet në 7 rajonet e Republikës së Kosovës

Lajmet lokale nuk do të jenë vetëm raportime, por do të jenë pasqyrim i jetesës, kulturave dhe ëndrrave të të gjitha komuniteteve që jetojnë në Kosovë.

Andaj, projekti ambicioz do të ketë një rubrikë të veçantë brenda Telegrafit për secilin rajon, duke ofruar përmbajtje të gjerë lokale si dhe reklama digjitale të personalizuara, motin lokal, një sektor të veçantë të aktiviteteve me rubrikën “Gjëra për të bërë”, buletin të personalizuar dhe më shumë. /Telegrafi/