Telefonata Nuland-Basha: SHBA pret reformën në drejtësi

Një komunikatë e orëve të mbrëmjes së të premtes, nga Ambasada e Shteteve të Bashkuara të Amerikës në Tiranë, ka bërë të ditur mbi një komunikim telefonik mes ndihmës-sekretares së Shtetit për Çështjet Europiane dhe të Euroazisë, Victoria Nuland, dhe kreut të Partisë Demokratike, Lulzim Basha.

Sigurisht që në qendër të telefonatës ka qenë reforma në drejtësi, teksa Nuland ka nxitur udhëheqësin e opozitës për përparim në lidhje me miratimin e kësaj reforme.

Victoria Nuland ka theksuar se krerët e partive politike duhet ta përdorin takimin e 6 qershorit mes Bashës dhe kryeministrit Rama, për të rënë dakord mbi miratimin e shpejtë të një reforme kuptimplotë dhe tërësore në drejtësi.

Nuland nënvizoi gjithashtu se kjo reformë gëzon mbështetje të gjerë mes popullit shqiptar, ndërsa mbetet prioritet i lartë në marrëdhëniet mes SHBA-ve dhe Shqipërisë, por edhe për përparimin e Shqipërisë drejt Bashkimit Europian.

Nga ana e tij, Basha rikonformoi qëndrimin e Partisë Demokratike në mbështetje të formulës së vendeve të rezervuara të propozuar nga SHBA dhe BE që prej muajit shkurt 2016 për institucionet e reja të sistemit të drejtësisë, si dhe e njohu ndihmës-sekretaren e Shtetit me zgjidhjet e propozuara nga PD për thjeshtimin e arkitekturës së drejtësisë në funksion të moskapjes politike.

Duke theksuar se korrupsioni në drejtësi është produkt dhe pasojë e korrupsionit politik, Basha nënvizoi vendosmërinë e opozitës për të garantuar kushtet për zgjedhje të lira dhe të ndershme dhe në veçanti për votimin biometrik dhe elektronik, si prioriteti kryesor i demokracisë shqiptare.