Tela gjemborë në kufijtë e BE-së, Gjermania e konsideron mbrojtjen e kufijve si legjitime

Ministri i Brendshëm gjerman Horst Seehofer vlerësoi sot legjitime dëshirën për të mbrojtur kufijtë, ndërsa vendet evropiane po kërkojnë ndihmën e BE-së për të ngritur mure me tela gjemborë për të parandaluar ardhjen masive të emigrantëve.

Polonia kërkoi 350 milionë euro dhe mobilizoi mijëra trupa në kufi për të ndërtuar një gardh në kufirin e saj me Bjellorusinë.

I pyetur për nevojën e gardhit të ndërtuar nga Polonia, ministri i Brendshëm tha për Bild se “duket legjitime për ne që të mbrojmë kufirin e jashtëm (të BE-së) për të parandaluar kalimet e paligjshme”.

Mijëra emigrantë, kryesisht nga Lindja e Mesme, janë përpjekur të kalojnë kufirin që nga gushti, në një lëvizje migrimi që BE beson se Bjellorusia e ka inkurajuar në përgjigje të sanksioneve të Bashkimit Evropian.

Lituania ka nisur gjithashtu ndërtimin e një gardhi me tela gjemborë përgjatë kufirit të saj me Bjellorusinë.

Ministrat e brendshëm nga 12 vende (Austri, Bullgari, Qipro, Danimarkë, Estoni, Greqi, Hungari, Lituani, Letoni, Poloni, Republikë Çeke dhe Sllovaki) më 7 tetor i shkruan një letër KE-së përmes së cilës kërkohet që BE-ja të financojë ndërtimin.

Të premten, presidentja e Komisionit Evropian Ursula von der Leyen u përgjigj se Bashkimi Evropian nuk do të financojë “tela dhe mure gjembore” në kufij.

Seehofer gjithashtu paralajmëroi sot se kontrollet në kufirin me Poloninë do të forcohen dhe se një forcë policore prej 800 personash ishte vendosur tashmë.

“Nëse është e nevojshme, jam i gatshëm t’i forcoj edhe më tej”, tha ai.

Sipas Ministrisë së Brendshme gjermane, rreth 5700 persona kanë kaluar ilegalisht kufirin mes vendit dhe Polonisë që nga fillimi i vitit.

Një trafikant i dyshuar i qenieve njerëzore u arrestua të shtunën pasi 31 emigrantë nga Iraku u gjetën në një furgon pranë kufirit polak.

Seehofer, i cili përjashtoi mbylljen e kufirit me Poloninë, i shkroi homologut të tij polak Mariusz Kaminski javën e kaluar dhe i sugjeroi që të rrisë patrullimet e përbashkëta përgjatë kufirit para një numri në rritje të emigrantëve.

Mariusz Kaminski u përgjigj se Polonia do të ofronte “mbështetje të plotë” për këto masa. /kp/Telegrafi/