As të dielën nuk gjendet Enver Sekiraqa, pse u la ai në arrest shtëpiak?

Po vazhdon ende të jetë në pikëpyetje nëse Enver Sekiraqa është larguar nga Kosova ose jo. Policia e Kosovës ka bërë të ditur se ende nuk kanë ndonjë informacion të ri sa i përket këtij rasti.

As të dielën Policia e Kosovës nuk ka arritur që të gjejë gjurmët se ku mund të jetë arratisur, Enver Sekiraqa.

Kështu kanë thënë për Dukagjinin nga Policia të cilët kanë rekomanduar që të referohet komunikata e lëshuar para gati më shumë se 24 orë më parë.

Ndërkohë që më 3 maj, Gjykata Themelore në Prishtinë e dënoi Sekiraqën me 25 vjet burgim për nxitje të vrasjes së policit Triumf Riza.

Vendimi për të është marrë në mungesë të tij, të avokates së tij dhe në mungesë të prokurorit të rastit.

Lexo po ashtu Arratisja e Enver Sekiraqes, flet avokatja e tij

Por se a janë këto raste të veçanta dhe si trajtohen nga sistemi drejtësisë, ka treguar avokatja Fehmie Gashi.

“Ndryshimi i kodit të procedurës penale e ka fut në mënyrë të veçantë edhe gjykimin në mungesë por e specifikon se detyrimisht i pandehuri të marr pjesë në seancën fillestare  dhe pastaj mund të mbahet në mungesë të tij dhe kjo e ka arsyetua vendimin e Gjykatës që kjo të bëhet pa prani të tij dhe jo vetëm të tij”, shtoi Fehmije Gashi-Bytyqi.

Avokatët dhe monitoruesit e sistemit të drejtësisë presin hapa konkret nga mekanizmat përkatës, pasi që sipas tyre Sekiraqa është dashur që të përcillej nga Policia e Kosovës.

Lexo po ashtu Kryeprokurori special flet për rastin e Enver Sekiraqes

“Në parim Gjykata ka diskrecionin për ndërrimin e masave për sigurimin e të pandehurit në procedurë,  se a është vendosur në parim më kodin e  procedurës dhe brenda diskrecionit të Gjykatës po besoj do të verifikohet nga mekanizmat e sigurisë pa e cenuar parimin e diskrecionit nga Gjykata”,  tha Valdet Hoxha- ish-kryeshef i Inspektoratit të Policisë së Kosovës

Ndërkohë kryetari i komisionit parlamentar për Legjislacion, deputeti i LVV-së, Adnan Rrustemi, ka drejtuar gishtin e fajit për këtë rast tek gjyqësori, për çka ka thënë se krejt kjo nuk është e rastësishme.

Lexo po ashtu Arratiset Enver Sekiraqa, policia ka informuar të gjitha vendkalimet kufitare

“Fakti që befasohemi rast pas rasti me sistemin tonë gjyqësor si ky i djeshmi me arratisjen e Sekiraqës në fakt do të duhej të na bënte të reflektojmë pak më thellë. Kjo nuk është rastësi, por shprehi e këtij sistemi. Për aq kohë sa nuk do të ketë vetting në këtë sistem, këto raste nuk do të jenë më raste, por sistem e mentalitet i punës”, ka shkruar Rrustemi.

Enver Sekiraqa i dënuar për nxitjen e vrasjes së policit Trium Riza, kishte qenë në arrati 5 vjet para se t’i dorëzohej organeve të drejtësisë.