Tarifat tregtare ngadalësojnë ekonominë amerikane

Ekonomia e Shteteve të Bashkuara të Amerikës është ngadalësuar më pak se që pritej në tremujorin e tretë 2018, ndërkohë që rënia e eksporteve si pasojë e tarifave tregtare, u kompensua nga shpenzimet e forta konsumuese. Kjo ka mbajtur rritjen ekonomike brenda objektivit të Donald Trump, në 3 për qind për këtë vit.

Sipas Departamentit të Tregtisë, Produkti i Brendshëm Bruto u rrit me 3.5 për qind në periudhën korrik-shtator 2018 me bazë vjetore dhe mori gjithashtu nxitje nga investimet në inventarë dhe shpenzimet qeveritare.

Deri sa kjo normë ra poshtë rritjes prej 4.2 për qind në tremujorin e dytë, ishte ende sipër potencialit të rritjes ekonomike, që sipas analistëve qëndron në 2 për qind. Megjithatë, kishte faktorë paralajmërues ndaj zgjerimit ekonomik, që ka arritur tashmë vitin e nëtë radhazi të rritjes, që është periudha e dytë më e gjatë në histori. Shpenzimet e bizneseve u ngadalësuan dhe investimet në shtëpi ranë për të tretin tremujorë radhazi, duke treguar se reduktimet tatimore prej 1.5 trilion dollarë kanë ndaluar së dhënuri efekt dhe normat e larta të interesit po dëmtojnë tregun e pronave.

Stimujt fiskalë janë pjesë e masave të adaptuara nga presidenti Trump, për të nxitur rritjen ekonomike në 3 për qind në mënyrë të qëndrueshme. Megjithatë, administrata është përfshirë në një luftë tregtare me Kinën dhe ngadalësimi i lehtë në tremujorin e tretë, reflektoi kryesisht tarifat e Pekinit ndaj eksporteve amerikane, përfshirë sojën. /Telegrafi/