Tahiri: Vuçiq është mërzitur, sepse e kemi shuar policinë paralele serbe

Duke reaguar në deklaratën e kryeministrit të derisotëm serb, Aleksandar Vuçiq, ministrja në detyrë për Dialog, Edita Tahiri, ka thënë se Vuçiq është mërzitur sepse e kemi shuar policinë paralele serbe në veri të Kosovës, prandaj flet me gjuhën e tij të pamatur dhe nacionaliste.

“Policia e Kosovës është në tërë shtetin e Kosovës, ndërsa në veri jo vetëm që Zëvendësdrejtori është shqiptar por edhe gjithë struktura është me përbërje shumetnike, sepse Kosova është një shtet demokratik në vepër, dhe jo si Serbia që demokracinë e ka në fjalë dhe nacionalizmin në vepra”, ka thënë Tahiri, transmeton Telegrafi.

“Kjo tregohet më së miri me faktin se shqiptarët në Serbi kanë më pak të drejta se sa serbët në Kosovë. Por një ditë, edhe Serbia do të detyrohet të heq sëmundjen e nacionalizmit nëse e dëshiron vërtet Evropën”, ka thënë Tahiri.

Lexo po ashtu Vuçiq: Ne morëm vendimin që asnjë polic shqiptar të mos shkelte në veri

Reagimi i ministres Tahiri vjen pas deklaratës së Vuçiqit se në marrëveshjen e Brukselit ai kishte marrë vendim që të gjithë policët në Veri të Kosovës të jenë të kombësisë serbe. /Telegrafi/