Lajme Kosovë

Tahiri: Ulja e shtesave ka prekur ekonomitë familjare

Para 4 vitesh

Grupi Parlamentar i Aleancës për Ardhmërinë e Kosovës (AAK) ka thirrur në interpelancë ministrin e Ministrisë së Financave, Punës dhe Transfereve, Hekuran Murati në lidhje me uljen e shtesave të pensionistëve, stafit shëndetësor dhe institucioneve të sigurisë.

Shefi i GP të AAK-së, Besnik Tahiri tha se shtesat nuk janë asgjë më shumë se një kompensim minimal i punës dhe rrezikut për këto kategori.

“Kjo temë kërkon debat serioz, e përmbajtjesor nga qeveria e kuvendi. Para së gjithash, duhet theksuar se shtesat, nuk janë asgjë më shumë se një kompensim minimal i punës dhe rrezikut për këto kategori, pa përshirë lodhjen e shqetësimin për familjet, e po ashtu është përkrahje minimale për sigurim të ekzistencës për kategoritë sociale e pensionistët. Pra, debati në kuvend, duhet të shtrohet mbi këto të vërteta, përkundër se gjendja e ballafaqimi mbetet i njëjtë, shto këtu faktin e lodhjes sistematike, e ku shumicës prej tyre u është rënduar situata qoftë shëndetësore e socio-ekonomike”, tha Tahiri.

Ai tha se sipas vlerësimeve nga indeksi i Harmonizuar i Çmimeve të Konsumit (IHÇK), Mars 2021, rritja e çmimeve të produkteve bazë ishte 1.2% sipas këtyre vlerësimeve, rreth 40% e të ardhurave në ekonomitë familjare kosovare, shkojnë për konsum ditor.

“Tashmë e 14 muaj ballafaqim me pandeminë, efektet janë më të dukshme, që domosdo i afekton direkt këto kategori, e secilin qytetarë, pasur parasysh shpenzimet e mjekimit, reduktimin e të hyrave në familje, e po ashtu edhe pasojat psikologjike. Ulja e shtesave, jo vetëm se ka prekur direkt ekonomitë familjare, por para së gjithash, ka dekurajuar gjithë ata mjek, polic, inspektor e shërbyes, e po ashtu, ka rritur pasigurinë për kategoritë sociale e pensionistët, në këtë kohë që pothuajse në të gjitha produktet bazike ka rritje çmimesh. Sipas vlerësimeve nga indeksi i Harmonizuar i Çmimeve të Konsumit (IHÇK), Mars 2021, rritja e çmimeve të produkteve bazë ishte 1.2% sipas këtyre vlerësimeve, rreth 40% e të ardhurave në ekonomitë familjare kosovare, shkojnë për konsum ditor. Pra, në atë që konsumatorët kanë blerë me 100 Euro, s’mund ta blejnë me 130 Euro. Ndërkaq përderisa, pensionistët kanë marrë shtesë, 30 Euro, tashmë ata marrin 10 Euro”, shtoi Tahiri.

“Përtej, këtyre shtesave, nuk duhet harruar edhe se vendimi paraprak, ka mbuluar edhe një pjesë të kostos së energjisë elektrike, duke ndikuar në rënien të shpenzimeve. Tashmë, kjo përkrahje nuk është vazhduar e që do ta rëndoj edhe më shumë, barrën socio-ekonomike të këtyre familjeve”.

“Ajo çka është për turp ne politika pa dallim, në fushata e takime rrezikuam rritjen e numrit e rrezikun këto kategori. E si për shpagim, ndër vendimet e para, pa asnjë konsultim erdhi vendimi për uljen e këtyre shtesave. Andaj, ju ministër, qeveria, e ne kuvendi, në këto rrethana, me gjithë këto pasoja e kufizime, së paku duhet të ruajmë sinqeritetin, t’ju a themi mjekëve, policëve, inspektorëve, pensionistëve e kategorive sociale, se në fushata u harrua pandemia, përderisa ju u ballafaquat, e ndërkaq kur erdhi koha për vendime, ne ju harruam”.

Tahiri ka kërkuar që të sillet në Kuvend Ligji i Pagave në mënyrë që kompensimi i mundit e rrezikut të jetë i normuar.

“Pres, që shpejt ta kemi në kuvend Ligjin e Pagave, që kompensimi i mundit e rrezikut të jetë i normuar, në mënyrë që të këto kategori të mos jenë në mëshirën e vullnetin e politikës, e po ashtu së bashku ta definojmë pagesën e zjarrfikësve, përmes Ligjit për Financat e Pushtetit Lokal, që ti japim fund trajtimit që gjatë është i padrejtë e aspak falënderues. Për këtë e kemi deklaruar përkrahjen ashtu siç do ta keni për secilin vendim e nismë në të mirë të qytetarëve”, përfundoi Tahiri.