Tahiri: Të shkarkohet kryeshefi i KEK-ut, Nagip Krasniqi

Shefi i Grupit Parlamentar të Partisë Demokratike të Kosovës, Abelard Tahiri në një konferencë për media ka folur për arrestimin e kryeshefit të KEK-ut, Nagip Krasniqi dhe zgjedhjet që u mbajtën ditën e diel në katër komunat në veri.

Tahiri ka thënë se kryeshefi ekzekutiv i KEK-ut duhet të shkarkohet, transmeton Telegrafi.

“Ky person duhet të shkarkohet,  po ashtu edhe bordi i KEK-ut. Për ne është e papranueshme që kryeshefi i korporatës më të madhe është në paraburgim dhe në të njëjtën kohë është ende drejtor. Do ta thërrasim një seancë të jashtëzakonshme, në lidhje me arrestimet e fundit në KEK dhe një sjellje të pahijshme të mazhorancës”, theksoi ai.

Lexo po ashtu Arrestohet Nagip Krasniqi - kryeshef ekzekutiv i KEK-ut

Sa i përket procesit zgjedhor në veri, Tahiri theksoi se serbët që jetojnë në Kosovë nuk shohin nga e ardhmja.

“E dimë gjendjen në veri, ka qenë obligim i ynë me aq sa ka votues të kemi kandidatë. Ne fatkeqësisht po shohim një manipulim të madh të Serbisë në veri. Serbët në veri nuk shohin nga e ardhmja janë të varur nga Serbia”, u shpreh ai.

Në zgjedhjet e mbajtura ditën e diel në veri, pjesmarrja e qytetarëve ishte shumë e ulët, megjithatë procesi ka shkuar në rregull dhe pa ndonjë incident. /Telegrafi/