“Ta Pastrojmë Kosovën” rikthehet në lagjen e romëve në Mitrovicë

Nisma “Ta Pastrojmë Kosovën” do të kthehet për herë të dytë në lagjen “Adem Voca” apo siç njihet ndryshe lagjja e Romëve, për ta liruar nga mbeturinat dhe një pjesë tjetër të lagjes.

Kjo nismë rezultoi suksesshëm në javën e shkuar, kur nga kjo lagje largoi një deponi ilegale, ndërsa tash të ftuar nga vetë banorët do të largojnë dhe një deponi tjetër.

“Pas aksionit të javës së kaluar kemi marrë kërkesë nga banorët e lagjes të cilët janë vetorganizuar dhe kanë kërkuar mbështetje logjistike për pastrimin e dy deponive të mëdha dhe të gjitha mbeturinave të tjera që gjenden në atë lagje. Përpos banorëve të lagjes në aksion do të marrin pjesë edhe vullnetarët nga Let’s do it Kosova ndërsa ndërmarrja e pastrimit “Uniteti” do të ofrojë makinerinë e saj së bashku me një pjesë të stafit. Llogarisim që nesër të përfundojmë pastrimin e lagjes së Romëve dhe jemi duke bërë përpjekje për të arritur marrëveshje në mes të banorëve, ndërmarrjes “Uniteti” dhe Komunës për të bërë pajisjen e tyre me kontejnerë. Hapësirat e pastruara do të nivelizoh en me dhe si dhe do të mbillet bari”, thuhet në një komunikatë për media të nismës “Ta Pastrojmë Kosovën”.

Në komunikatë thuhet se aktivitetet e fushatës do të pasohen me aksione pastrimit nëpër lokalitete të ndryshme të Kosovës, vazhdimin e hartëzimit të deponive ilegale nëpër të gjitha Komunat, hartëzimin e mbeturinave nëpër lumenj, aktivitete të ndryshme avokuese dhe për të vazhduar me organizimin e aksionit të pastrimit të Kosovës i cili edhe këtë vit do të organizohet me 24 Maj.

Nisma “Ta Pastrojmë Kosovën” ju bënë thirrje të gjithë qytetarëve që së pari të rrisin kujdesin për mjedisin dhe të bashkëngjitën në aksionet e pastrimit që organizon nisma dhe së bashku të forcohet presioni tek institucionet për përmirësimin e gjendjes së mjedisit në vendin tonë.

Sipas raportit të hartëzimit të deponive ilegale të realizuar nga Let’s do it Kosova në 24 komuna janë evidentuar mbi 1000 de poni ilegale me mbeturina. /Telegrafi/