Sylejman Selimi, anëtar i ri i Komitetit Ekzekutiv të FFK-së

Sylejman Selimi është emëruar të mërkurën anëtar i Komitetit Ekzekutiv i Federatës së Futbollit të Kosovës.

Në njoftimin e FFK-së thuhet se kontributi i Selimit në futbollin e Kosovës ka qenë i madh si para ashtu edhe pas luftës në Kosovë.

Selimi në të kaluarën ka qenë futbollist dhe ka luajtur për Malushgatin e Klinës (Dukagjinin), Buduqnostin e Skenderajt, ndërsa ka luajtur edhe për klubin e Drenicës.

“Sylejman Selimi ishte një nga futbollistet më të shquar të kohës. Gjatë viteve të 80-ta kur ishte në fillet e karrierës, Selimi mbrojti ngjyrat e klubeve, KF Malushgat (Dukagjini) dhe KF Buduqnosti nga Skenderaj, ndërsa në vitet 90’-96’, karrierën e tij prej futbollisti e zhvilloi në KF Drenica”.

“Ish-mesfushori drenicas ishte edhe pjesë e Kombëtares së Kosovës të asaj kohe”.

“Dëshira për të kontribuar në zhvillimin e futbollit kosovar vazhdoi edhe pas luftës së fundit në vend, me ç’rast angazhimin e tij e vazhdoi në struktura udhëheqëse, në vitin 1999-2000 ishte president i  KF Drenica, kur edhe klubi ishte inkuadruar për herë të parë në Superligë, më pas në periudhën 2000-2001, Selimi ishte drejtor dhe më pas edhe kryetar i Klubit të Futbollit Prishtina”.

“Gjeneral Selimi asnjëherë nuk u shkëput nga futbolli, ai vazhdon të jetë pjesë e Ligës dhe Kombëtares së Veteranëve”, thuhet në njoftimin e FFK-së.

Sylejman Selimi ka qenë njëri ndër udhëheqësit e luftës së UÇK-së. /Telegrafi/